فون ہیکنگ پروزارت اطلاعات و نشریات کی جانب سے ایپل کو نوٹس

نئی دہلی: وزارت اطلاعات و نشریات نے جمعرات (2 نومبر) کو ایپل کو ایک نوٹس جاری کیا جس میں الرٹ پیغام کے بارے میں پوچھا گیا۔ نوٹس میں سوال کیا گیا ہے کہ ‘سرکاری اسپانسرڈ حملے کے کیا ثبوت ہیں۔ اپوزیشن لیڈروں نے خدشہ ظاہر کیا تھا کہ حکومت ان کے فون ہیک کرنے کی کوشش کر رہی ہے۔ اس پیغام میں ‘سرکاری سپانسرڈ چوری کی کوششوںکا ذکر کیا گیا تھا۔ اس پورے معاملے کے بعد ملک میں ہنگامہ شروع ہو گیا۔
خبر کے مطابق انفارمیشن ٹیکنالوجی کے سکریٹری ایس کرشنن نے جمعرات کو کہا کہ ’سی ای آر ٹی-اِن‘ نے ایپل کی طرف سے ان کو بھیجے گئے انتباہی پیغام کے بارے میں اپوزیشن جماعتوں کے اراکین پارلیمنٹ کی طرف سے اٹھائے گئے معاملے کی تحقیقات شروع کر دی ہیں۔ انہوں نے کہا کہ اس سلسلے میں کمپنی کو نوٹس بھی بھیج دیا گیا ہے۔ آئی ٹی سکریٹری نے امید ظاہر کی کہ ایپل اس معاملے پر ’سی ای آر ٹی-ان‘ کی تحقیقات میں تعاون کرے گا۔
مرکزی وزیر اطلاعات و ٹیکنالوجی اشونی ویشنو نے اپوزیشن کے الزامات کو مسترد کرتے ہوئے کہا کہ حکومت اس کی مکمل تحقیقات کرے گی۔ کانگریس کے صدر ملکارجن کھڑگے، پارٹی قائدین کے سی وینوگوپال، ششی تھرور، پون کھیڑا، سپریا شرینیت اور ٹی ایس سنگھ دیو، شیو سینا (یو بی ٹی) کی رکن پارلیمنٹ پرینکا چترویدی، ترنمول کانگریس لہ مہوا موئترا، عام آدمی پارٹی (عآپ) کے راگھو چڈھا، سی پی آئی (ایم) کے جنرل سکریٹری سیتارام یچوری، سماج وادی پارٹی کے صدر اکھلیش یادو کو بھی ایسا ہی پیغام موصول ہوا ہے۔