دہلی اور آس پاس کے علاقوں میں شدید سردی نے لوگوں کوٹھٹھرنے پر مجبور کردیا ہے۔ ایک طرف جہاں کم سے کم درجہ حرارت 7 ڈگری سیلسیس تک پہنچ گیا ہے وہیں دوسری طرف شدید کہرے نے بھی لوگوں کا جینا محال کر دیا ہے۔ اس دوران ہندوستان کے محکمہ موسمیات نے دہلی- این سی آر خطے کے لیے یلو الرٹ جاری کیا ہے۔ محکمہ موسمیات (آئی ایم ڈی) کا کہنا ہے کہ سرد ہواؤں کی بڑھتی رفتار کے ساتھ ہوا کا معیار انتہائی خراب زمرے میں پہنچ گیا ہے جس سے صحت اور ٹریفک دونوں بری طرح متاثر ہو رہے ہیں۔
دہلی-این سی آر میں گزشتہ دو دنوں سے سردی مسلسل بڑھ رہی ہے، صبح سے شام تک دھوپ ندارد ہے۔ شدید کہرے نے پورے خطے کو اپنی لپیٹ میں لے لیا ہے، جس سے حد بصارت کم ہو گئی ہے اور ٹھٹھرن کا احساس بڑھ گیا ہے۔ سرد ہوائیں جو پہلے 8 سے 20 کلومیٹر فی گھنٹہ کی رفتار سے چل رہی تھیں، آج سے 25 کلومیٹر فی گھنٹہ کی رفتار تک چلنے کا امکان ہے۔ یہ تیز ہوائیں درجہ حرارت میں مزید کمی کا باعث بن رہی ہیں جس سے لوگوں کی روزمرہ کی مشکلات میں اضافہ ہو رہا ہے۔
محکمہ موسمیات کے مطابق فی الحال سرکاری طور پر سرد لہر کا اعلان نہیں کیا گیا ہے تاہم موسم کی شدت کے پیش نظر یلو الرٹ جاری کر دیا گیا ہے۔ کئی علاقوں میں صبح اور شام کے اوقات میں شدید کہرا چھایا رہتا ہے۔ ٹھنڈی ہوائیں سردی میں اضافہ کریں گی جس سے عمر دراز لوگوں اور بچوں کو زیادہ خطرہ ہوگا۔ آئی ایم ڈی نے لوگوں کو مشورہ دیا ہے کہ وہ احتیاط برتیں، صبح جلدی باہر نکلنے سے گریز کریں اور حادثات کے خطرے کو کم کرنے کے لیے ہائی ویز پر غیر ضروری سفر نہ کریں۔
اس دوران دہلی میں زیادہ سے زیادہ درجہ حرارت 20 ڈگری سیلسیس اور کم سے کم 8 ڈگری سیلسیس ریکارڈ کیا گیاجب کہ اے کیو آئی 334 رہا۔ اس کے ساتھ ہی نوئیڈا کا درجہ حرارت 22 اور 11 ڈگری کے درمیان رہا اور اے کیو آئی 328 درج کیا گیا۔ غازی آباد میں حالات سب سے زیادہ خراب رہے جہاں اے کیو آئی 444 سے 484 تک پہنچ گیا اور درجہ حرارت 21 اور 11 ڈگری سیلسیس رہا۔
ادھر گوڑگاؤں میں اے کیو آئی 323 اور گریٹر نوئیڈا میں 432 درج کیا گیا ہے۔ آئی ایم ڈی کے مطابق 27 دسمبر تک پورے ہفتے سردی کا اثر رہے گا۔ اس دوران زیادہ سے زیادہ سے درجہ حرارت 19 اور کم سے کم 7 ڈگری سیلسیس تک پہنچ سکتا ہے۔ اس صورتحال میں شدید کہرا اور ٹھنڈی ہوائیں لگاتار چلتی رہیں گی اور ضرورت پڑنے پر محکمہ موسمیات آگے الرٹ جاری کرتا رہے گا۔
