نئی دہلی : کیرالا حکومت نے سپریم کورٹ میں درخواست دائر کر کے مقامی بلدیاتی انتخابات مکمل ہونے تک ایس آئی آر عمل روکنے کا مطالبہ کیا، جبکہ آئی یو ایم ایل نے بھی کہا ہے کہ دونوں عمل بیک وقت ممکن نہیں ۔ترواننت پورم: کیرالہ حکومت نے انتخابی فہرست کے اسپیشل انٹینسِو ریویڑن (ایس آئی آر) کو فوری طور پر روکنے کی غرض سے سپریم کورٹ میں اپیل دائر کی ہے۔ حکومت کا کہنا ہے کہ ریاست میں رواں ماہ ہونے والے مقامی بلدیاتی انتخابات کے دوران ایس آئی آر جیسی وسیع انتظامی کارروائی کا بیک وقت انعقاد عملی طور پر ناممکن ہے اور اس سے انتظامی مشینری پر شدید دباؤ پڑے گا۔ریاستی حکومت کے مطابق، اس نے آئینِ ہند کے آرٹیکل 32 کے تحت یہ درخواست داخل کی ہے، جس میں مؤقف اختیار کیا گیا ہے کہ انتخابات کے ایام میں ایس آئی آر جاری رہنے سے نہ صرف عملے کی قلت پیدا ہوگی بلکہ انتخابی سرگرمیوں پر بھی منفی اثر پڑے گا۔
حکومت نے بتایا کہ ریاست میں 1,200 مقامی خود حکومتی ادارے (ایل ایس جی آئی) موجود ہیں جن میں 941 گرام پنچایتیں، 152 بلاک پنچایتیں، 14 ضلع پنچایتیں، 87 میونسپلٹیاں اور 6 کارپوریشن شامل ہیں۔ ان کے مجموعی 23,612 وارڈوں میں انتخابی عمل 9 اور 11 دسمبر کو مکمل ہونا ہے، جب کہ ووٹوں کی گنتی 13 دسمبر کو ہوگی۔درخواست میں کہا گیا ہے کہ ان انتخابات کے انعقاد کے لیے کم از کم 1,76,000 اہلکار، اور سیکورٹی کے لیے 68,000 جوان درکار ہوں گے۔ دوسری جانب ایس آئی آر کے لیے مزید 25,668 ملازمین کی ضرورت ہے، جس کے باعث ریاستی انتظامیہ پر بیک وقت دو بڑے عمل چلانے کا غیر معمولی دباؤ پڑ جائے گا۔
