ہندوستان میں ٹیکنالوجی کو فروغ دینے کی کوششیں مسلسل جاری ہیں۔ اسی کوشش کا ایک بہترین نتیجہ ’میوزیکل سڑک‘ کی شکل میں سامنے آیا ہے۔ یہ تجربہ ممبئی کی سڑکوں پر دیکھنے کو ملے گا۔ ممبئی کوسٹل روڈ پر نریمن پوائنٹ سے ورلی کی جانب جانے والی گاڑیوں کے ڈرائیورس کو سڑک پر لگائی گئی میوزیکل اسٹرپس کی وجہ سے ایک انوکھا ڈرائیونگ تجربہ حاصل ہوگا۔ یہ پہلی بار ہے کہ کسی سڑک کو ’میوزیکل سڑک‘ بنایا گیا ہے۔ موصولہ اطلاع کے مطابق بی ایم سی نے اس سڑک کو 6.21 کروڑ روپے (جی ایس ٹی سمیت) کی لاگت سے تیار کیا ہے۔
ہندوستان کی پہلی ’میوزیکل سڑک‘ کا افتتاح 11 فروری کو وزیر اعلیٰ دیویندر فڑنویس کے ہاتھوں سے عمل میں آیا۔ ممبئی کوسٹل روڈ پر نریمن پوائنٹ سے ورلی کی طرف جانے والے ڈرائیورس کو سڑک پر خاص طور پر نصب کی گئی میوزیکل اسٹرپس کے باعث ایک منفرد تجربہ ہوگا۔ اس طرح کی سڑکیں اس وقت جاپان اور دبئی جیسے ممالک میں موجود ہیں۔ ہندوستان میں ممبئی پہلا شہر ہے جہاں میوزیکل سڑک بنائی گئی ہے۔
ممبئی کوسٹل سڑک، جو ٹریفک سے پاک، تیز اور آرام دہ سفر کی علامت بن چکی ہے، یہاں ایک خاص تکنیکی میوزک لین تیار کی گئی ہے۔ جب گاڑیاں اس میوزک لین سے گزریں گی تو انہیں فلم ’سلم ڈاگ ملینیئر‘ کا نغمہ سنائی دے گا۔ یہ دنیا کا پانچواں اور ہندوستان کا پہلا ایسا تجربہ ہے۔ اس طرح کی سڑک پر مخصوص وقفوں سے خانے یا پٹیاں بنائی جاتی ہیں، اور جب گاڑیاں ایک خاص رفتار سے ان پر سے گزرتی ہیں تو ٹائروں کے رگڑ سے ایک مخصوص موسیقی جیسی آواز کی لہریں پیدا ہوتی ہیں۔ یہ ملک میں اپنی نوعیت کا پہلا انسٹالیشن ہوگا، جس میں آسکر یافتہ فلم ’سلم ڈاگ ملینیئر‘ کی موسیقی استعمال کی گئی ہے۔ ایک سینئر سٹی افسر نے کہا کہ ’جے ہو‘ کی موسیقی کو اس کے لیے منتخب کیا گیا ہے۔ یہ نغمہ لوگوں میں حب الوطنی کا جذبہ پیدا کرتی ہے۔
