نئی دہلی: جمعیۃ علماء صوبہ دہلی کی مجلسِ عاملہ کا ایک اہم اجلاس مسجد تکیہ کالے خاں میں منعقد ہوا، جس کی صدارت مولانا محمد قاسم نوری قاسمی نے کی، جبکہ نائب صدر قاری عبد الغفار نے سرپرستی فرمائی۔ اجلاس میں تنظیمی، تعلیمی، دعوتی اور سماجی سرگرمیوں کے فروغ سے متعلق متعدد اہم فیصلے کیے گئے۔
صدرِ اجلاس مولانا محمد قاسم نوری قاسمی نے اپنے خطاب میں جمعیۃ علماء کے آئندہ اہداف، تنظیمی ترجیحات اور مختلف شعبہ جاتی منصوبوں پر تفصیلی روشنی ڈالی۔ انہوں نے کہا کہ موجودہ حالات میں دینی و سماجی خدمات کو منظم اور مؤثر انداز میں آگے بڑھانے کی ضرورت ہے۔ اس موقع پر مفتی گلزار قاسمی، جنرل سکریٹری جمعیۃ علماء ضلع شاہدرہ، نے مثالی مساجد کے تصور، ان کے عملی خدوخال اور طریقۂ کار پر جامع گفتگو کی۔
اجلاس میں فیصلہ کیا گیا کہ آئندہ چھ ماہ کے دوران صوبہ دہلی کے ہر ضلع میں کم از کم پانچ تا چھ مثالی مساجد اور دس منظم مکاتب قائم کیے جائیں گے تاکہ دینی تعلیم، سماجی خدمات اور اصلاحی سرگرمیوں کو بہتر انداز میں فروغ دیا جا سکے۔ اس کے ساتھ مجلسِ عاملہ نے مثالی اضلاع کے قیام کے لیے رہنما اصولوں کی بھی توثیق کی۔ طے پایا کہ ہر ضلع پانچ بنیادی شعبہ جاتی امور پر لازمی طور پر عمل کرے گا، جبکہ اختیاری سرگرمیوں میں سے کم از کم دو پروگراموں کو نافذ کرنے کی کوشش کی جائے گی۔
اجلاس میں اضلاع کی کارکردگی کی بنیاد پر اے پلس، اے، بی، سی اور ڈی گریڈ مقرر کرنے کا فیصلہ بھی کیا گیا۔ نمایاں خدمات انجام دینے والے اضلاع اور ذمہ داران کو خصوصی اعزازات سے نوازا جائے گا۔ اس کے علاوہ صوبائی لیگل سیل کے تحت ہر ضلع میں ماہرینِ قانون پر مشتمل کمیٹی قائم کرنے کا اعلان کیا گیا۔ تحفظِ اوقاف اور تحفظِ مدارس کے لیے بھی صوبائی اور ضلعی سطح پر الگ الگ کمیٹیاں تشکیل دینے کے عزم کا اظہار کیا گیا۔
مجلسِ عاملہ نے 27 اور 28 جون 2026 کو دو روزہ خصوصی تربیتی ورکشاپ منعقد کرنے کا اعلان بھی کیا، جس میں تنظیمی استحکام، دینی تعلیم، سماجی خدمات اور جدید چیلنجز جیسے موضوعات پر خصوصی نشستیں رکھی جائیں گی۔ اجلاس میں صوبہ دہلی کے لیے آرگنائزر کے تقرر، زون وائز تنظیمی نظام کی تشکیل اور ہر ضلع میں کم از کم دس سمر کیمپ قائم کرنے کی تجاویز بھی منظور کی گئیں۔
اجلاس میں مولانا آفتاب عالم صدیقی، قاری احرار جوہر قاسمی، مولانا اخلاق قاسمی، نائب مفتی خلیل احمد قاسمی، قاری عارف قاسمی، قاری محمد سلیم، حافظ یوسف الاعظمی، مفتی نثار الحسینی، مفتی اشرف علی، قاری عبد السمیع، مفتی سلمان قاسمی، مفتی محمد انصار الحق قاسمی، قاری شاہد بدری، حاجی اسعد میاں، محمد اسرائیل، قاری عبد الشکور، قاری جاوید انصاری، مولانا شمیم قاسمی، مفتی جاوید قاسمی، مولانا جنید قاسمی، مولانا آصف بدری، مولانا عدنان الحسینی، مولانا رضوان انجم، مولانا غیاث مظاہری، مولانا ذاکر حسین اور قاری فیاض سمیت متعدد ذمہ داران شریک ہوئے۔ اجلاس کا آغاز مولانا کفایت اللہ کی تلاوتِ کلامِ پاک اور مولانا ارشد ندوی کی نعتِ رسولِ مقبول ؐ سے ہوا، جبکہ اختتام قاری عبد الغفار کی دعا پر ہوا۔
