ایمانداری اور خود داری کے ساتھ سیاحوں کی رہنمائی کے لیے مشہور نزاکت احمد شاہ جنہیں آج کل ’فرشتہ‘ اور عظیم انسانیت نواز کے طور پر یاد کیا جارہا ہے، جب وہ چھتیس گڑھ پہنچتے ہیں تو وہاں کا ماحول انتہائی جذباتی، شاباشی اور تالیوں سے گونج اٹھتا ہے۔ چھتیس گڑھ کے چرمیری قصبہ میں نزاکت شاہ کو جس طرح لوگوں نے گلے لگایا، سر پر ہاتھ پھیرا وہ ان کے لئے یادگار لمحہ تھا۔ یہاں کا ماحول انتہائی جذباتی تھا، لوگ تالیاں بجا رہے تھے اور پھول کی پتیاں نچھاور کر رہے تھے۔ نزاکت شاہ کوئی اور نہیں بلکہ وہ نوجوان ہے جس کی ہمت نے 6 ماہ قبل ایک پورے خاندان کی جان بچائی تھی۔
کشمیر کے پہلگام میں ہوئے خوفناک دہشت گردانہ حملے کے دوران گائڈ نزاکت احمد شاہ نے وہ کر دکھایا جس نے انسانیت کا سرفخرسے بلند کیا۔ 22 اپریل 2025 وہ دن تھا جب پہلگام کی وادیوں میں گولیوں کی گونج نے سیاحوں کو ہلاکر رکھ دیا تھا۔ دہشت گردوں نے اچانک حملہ کردیا تھا اور کچھ ہی منٹوں میں 26 معصوم جانیں ضائع ہوگئیں۔ ہر طرف افراتفری کا عالم تھا، لوگ اپنی جان بچانے کے لیے ادھر اُدھر بھاگ رہے تھے۔ اسی وقت وہاں چھتیس گڑھ کے بی جے پی کارکن اروند اگروال اپنے اہل خانہ کے ساتھ موجود تھے۔ دو چھوٹے بچوں سمیت پورا خاندان اس بھنور میں پھنس گیا جہاں ہر طرف سے موت جھانک رہی تھی۔
اطلاعات کے مطابق دہشت گردوں کی خوفناک فائرنگ کے دوران جائے وقوعہ پر مقامی گائیڈ نزاکت احمد شاہ نے بے مثال ہمت کا مظاہرہ کیا۔ گولیوں کی بارش کے درمیان اس نے اگروال خاندان کو محفوظ مقام تک پہنچایا۔ اپنی جان کی پرواہ نہ کرتے ہوئے شاہ نے بچوں کو گود میں اٹھاکر پتھروں اور درختوں کے پیچھے چھپا دیا اور آہستہ آہستہ انہیں فائرنگ کے علاقے سے باہر نکالا۔ نزاکت کی ہمت اورسمجھداری نے ایک پورے خاندان کو دہشت گردوں کے قہرسے بچالیا۔
اس واقعہ کے6 مہینے گزر گئے، زندگی معمول پر آ گئی ہے لیکن اس دن کی خوفناک یادیں کسی کے دل سے مٹ نہیں پائی ہیں۔ حال ہی میں جب نزاکت شاہ کاروبار کے سلسلے میں چھتیس گڑھ کے چرمیری پہنچے تو اروند اگروال خاندان نے ان کا استقبال اس بیٹے کی طرح کیا جو خاندان کو موت کے منھ سے کھینچ لایا تھا۔ پورے شہر میں اس جذباتی ملاقات کا ذکر ہورہا تھا۔ لوگوں نے نزاکت کو پھولوں کے ہار پہنائے اور اس کی ہمت کو سلام پیش کیا۔
