پٹنہ :راشٹریہ جنتادل (آر جے ڈی) کے سربراہ اور بہار کے سابق وزیر اعلیٰ لالو پرساد آج 77 سال کے ہو گئے اور78ویں سال کی شروعات کی۔ ان کے یوم پیدائش پر کنبہ، حامیوں اور پارٹی کارکنوں میں زبردست خوشی کا ماحول ہے۔ سابق وزیر اعلیٰ رابڑی دیوی کی 10 سرکلر روڈ واقع رہائش پر لوگوں کا ہجوم ہے۔ اس دوران ڈھول نگاڑے بجے، 78 کلو کا لڈو اور 78 پاؤنڈ کا کیک کاٹا گیا۔ یوم پیدائش پر لالو پرساد کو نہ صرف کنبہ بلکہ بہار اور دنیا بھر کے سیاسی رہنماؤں نے مبارک باد پیش کی۔
لالو پرساد نے آدھی رات کو کیک کاٹ کر اپنی عمر کے نئے سال کی شروعات کی۔ سبھی نے لالو کو یوم پیدائش پر مبارک دی اور ان کی بہتر صحت کے لیے دعائیں دیں۔ آر جے ڈی کے قومی جنرل سکریٹری انل کمار 78 طرح کے پھلوں کا ٹوکرا لے کر لالو یادو کو نیک خواہشات پیش کرنے پہنچے۔ ساتھ ہی کارکنوں کی طرف سے لایا گیا 78 کلو کا لڈو بھی مرکز کشش رہا، جسے لالو نے روایتی انداز میں تلوار سے کاٹا۔
رابڑی کی سرکاری رہائش کے باہر صبح سے ہی کارکنوں اور حامیوں کی بھیڑ جمع ہونی شروع ہو گئی تھی ڈھول نگاڑوں کی گونج کے درمیان لوگ ناچتے گاتے اور ’لالو یادو زندہ باد‘ کے نعرے لگاتے ہوئے نظر آئے۔ اس تعلق سے ایک ویڈیو میں دیکھا گیا کہ کئی کارکن لالو یادو کی تصویریں اور پوسٹر لئے ہوئے تھے۔ کچھ مٹھائیوں اور کیک کے ڈبے لے کر پہنچے تھے تو کچھ ہاتھوں میں تلواریں لہراتے ہوئے جشن منا رہے تھے۔
