دہلی میں پہلی بار پرعید کی نماز سڑک پرنہیں ہوئی ۔وی کے سکسینہ

نئی دہلی : دہلی کے لیفٹیننٹ گورنر وی کے سکسینہ نے کہا کہ اس سال کی عید پر دہلی کی تاریخ میں شاید پہلی بار سڑک پر نہیں بلکہ مساجد کے اندر ہوئی اور یہ ہم آہنگی اور مل جل کر رہنے کی ایک بہترین مثال ہے۔ ایل جی وی کے سکسینہ نے جمعرات کو عید کے موقع پر لوگوں کو مبارکباد دی۔ ایل جی نے کہا کہ اس سے ظاہر ہوتا ہے کہ سبھی مسائل کو باہمی بات چیت اور خیر سگالی کے ذریعے حل کیا جا سکتا ہے۔ سکسینہ نےایکس پر ایک پوسٹ میں کہا کہ دہلی میں کہیں بھی سڑکوں پر نماز نہیں پڑھی گئی اور کہیں بھی کوئی ناخوشگوار واقعہ پیش نہیں آیا۔ایل جی نےایکس پر عید الفطر کی مبارکباد کا اعادہ کرتے ہوئے لکھا کہ میں دہلی کی سبھی مساجد اور عیدگاہوں کے اماموں اور اپنے سبھی مسلمان بھائیوں کا مسجد کے احاطے میں نماز ادا کرنے کے لیے تہہ دل سے شکریہ ادا کرتا ہوں۔’ سکسینہ نے کہا کہ مسجد کے اندر نماز ادا کرکے مسلم کمیونٹی کے ارکان اور اماموں نے اس بات کو یقینی بنایا کہ سڑکوں پر جام نہ ہو اور عام آدمی کو کسی قسم کی پریشانی کا سامنا نہ ہو۔