102لوک سبھا نشستوں پرپہلے مرحلے کی پولنگ آج

نئی دہلی :پہلے مرحلے کی پولنگ کے لئے تیاریاں مکمل کرلی گئی ہیں۔ پہلے مرحلے میں آج یعنی19 اپریل جمعہ کو 17 ریاستوں اور چار مرکز کے زیر انتظام علاقوں میں 102 لوک سبھا حلقوں میں ووٹنگ ہوگی۔الیکشن کمیشن کے مطابق پہلے مرحلے میں 1,625 امیدوار میدان میں ہیں جن کی انتخابی مہم بدھ کی شام ختم ہوگئی۔پہلے مرحلے میں اروناچل پردیش، میگھالیہ، میزورم، ناگالینڈ، سکم، انڈمان اور نکوبار جزائر، لکشدیپ، پڈوچیری، اتراکھنڈ اور تامل ناڈو کے تمام پارلیمانی حلقوں میں پولنگ ہوگی۔
راجستھان کی 12 سیٹوں، اتر پردیش کی آٹھ سیٹوں، مدھیہ پردیش کی چھ سیٹوں، آسام اور مہاراشٹر کی پانچ پانچ سیٹوں، بہار کی چار سیٹوں، مغربی بنگال کی تین سیٹوں، منی پور کی دو سیٹوں اور چھتیس گڑھ، تریپورہ اور جموں و کشمیر میں سے ہر ایک کی ایک سیٹ کے لئے بھی ووٹنگ ہوگی۔لوک سبھا انتخابات کے پہلے مرحلے کے لئے ووٹنگ کے علاوہ جمعہ کے روز ایک ہی مرحلے میں اروناچل پردیش اور سکم میں اسمبلیوں کے انتخاب کے لئے بھی پولنگ ہوگی۔