شہرت یافتہ اداکارہ پونم پانڈے کا 32 سال کی عمر میں انتقال

ممبئی: بولڈنیس اور تنازعات سے شہرت پانے والی اداکارہ پونم پانڈے کا اچانک انتقال ہو گیا۔ ان کے منیجر نے اس خبر کی تصدیق کی ہے۔ بتایا جا رہا ہے کہ پونم سروائیکل کینسر میں مبتلا تھیں۔ اس خبر کے سامنے آنے کے بعد ان کے مداح صدمے میں ہیں۔اداکارہ کی ٹیم نے اپنے بیان میں اس بات کا انکشاف کیا ہے 32 سالہ پونم پانڈے کو سروائیکل کینسر کا سامنا تھا۔ پونم پانڈے کی ٹیم نے اپنے آفیشل انسٹاگرام پیج سے سوشل میڈیا پر ایک باضابطہ بیان جاری کیا ہے۔ اس میں لکھا ہے، ’’آج کی صبح ہم سب کے لیے بہت مشکل ہے۔ ہمیں یہ اعلان کرتے ہوئے دکھ ہو رہا ہے کہ ہم نے اپنی پیاری پونم کو سروائیکل کینسر کی وجہ سے کھو دیا ہے۔ انہوں نے ہر اس جاندار کو مکمل محبت اور شفقت بخشی، جس کا ان سے واسطہ پڑا۔ اس دکھ کی گھڑی میں ہم مداحوں سے رازداری کی درخواست کرتے ہیں تاکہ ہم انہیں پیار سے یاد کر سکیں۔
پونم پانڈے کے انسٹاگرام سے شیئر کی گئی اس پوسٹ کے بعد سوشل میڈیا پر ان کے مداح پریشان ہو گئے۔ کئی صارفین نے اس پوسٹ پر تبصرہ کرتے ہوئے پوچھا کہ کیا یہ مذاق ہے؟ کیا پونم کی ٹیم کسی پروجیکٹ کو فروغ دینے کے لیے یہ چال آزما رہی ہے؟ کیا وہ سروائیکل کینسر کے بارے میں آگاہی پھیلانا چاہتی ہیں یا ان کا اکاؤنٹ ہیک ہو گیا ہے؟
تاہم نیوز چینل ’آج تک‘ نے پونم پانڈے کی انتظامی ٹیم سے بات کی۔ انہوں نے بتایا کہ پونم کچھ عرصہ قبل کینسر میں مبتلا پائی گئی تھیں۔ یہ آخری سٹیج کا کینسر تھا۔ وہ یوپی میں اپنے آبائی شہر میں تھیں اور وہاں سے علاج کروا رہی تھی۔ ان کی آخری رسومات بھی وہیں ادا کی جائیں گی۔ اس بارے میں مزید تفصیلات حاصل کرنا باقی ہیں۔