شاہی عیدگاہ کمپلکس کے سروے کے مطالبے پر الہ آباد ہائی کورٹ میں فیصلہ محفوظ

الہ آباد: متھرا میں شری کرشن جنم بھومی۔شاہی عیدگاہ تنازعہ کیس میںکل الہ آباد ہائی کورٹ میں ہندو فریقین کی ایک عرضی پر سماعت کی گئی۔ سماعت کے بعد ہائی کورٹ نے شاہی عیدگاہ کمپلکس کے سروے کا مطالبہ کرنے والی درخواست پر فیصلہ محفوظ رکھ لیا۔ اب کیس سے متعلق تمام 16 مقدمات کی سماعت ایک ساتھ شروع ہوگی۔ ہندو فریقین نے کورٹ کمشنر اور اے ایس آئی کے سروے کا مطالبہ کیا ہے۔الہ آباد ہائی کورٹ میں ہندو فریق کی جانب سے وشنو شنکر جین خود بھی موجود تھے۔ اسی دوران مسلم فریق کی جانب سے وکیل محمود پراچہ نے دلائل پیش کئے۔ وشنو شنکر جین نے بتایا کہ اس معاملہ میں انہوں نے کورٹ کمشنر کے ذریعہ شاہی عیدگاہ مسجد کے سروے کے لئے درخواست دائر کی تھی۔ جس پر معزز ہائی کورٹ نے فیصلہ محفوظ رکھ لیا ہے۔خیال رہے کہ ہندو فریق کی جانب سے یہ دلیل دی گئی تھی کہ مسجد کے نیچے کئی نشانات ہیں جو ہندوؤں کے جذبات سے جڑے ہوئے ہیں۔ تاہم مسجد کمیٹی کی طرف سے اس کی مخالفت کی گئی۔ تمام فریقین کو آئندہ سماعت پر پیش ہونے کا حکم دیا گیا ہے۔ معلوم ہوا ہے کہ متھرا ڈسٹرکٹ کورٹ سے منتقل کی گئی تمام 16 عرضیوں پر ہائی کورٹ براہ راست سماعت کر رہا ہے۔دائر درخواستوں میں جملہ چار فریق ہیں جن میں شاہی عیدگاہ مسجد، یوپی سنی سنٹرل وقف بورڈ، شری کرشنا جنم بھومی سیوا سنگھ اور شری کرشنا جنم بھومی سنگھ شامل ہیں۔اس کے علاوہ درخواستوں میں 12 اکتوبر 1968 کو ہونے والے معاہدے کو غیر قانونی قرار دیا گیا ہے۔ اس معاہدے کے تحت شاہی عیدگاہ مسجد کو دی گئی 13.37 ایکڑ زمین بھگوان شری کرشنا کے حوالے کرنے کا مطالبہ کیا گیا ہے۔ ہندو فریق کی طرف سے دائر درخواستوں میں مبینہ طور پر غیر قانونی طور پر تعمیر کی گئی شاہی عیدگاہ مسجد کو ہٹانے کا مطالبہ کیا گیا ہے، تاکہ ایودھیا کے رام مندر کی طرح متھرا میں بھی ایک عظیم الشان کرشنا مندر بنایا جا سکے۔آج ہائی کورٹ میں سماعت کے دوران شاہی عیدگاہ مسجد کے وکیل نے کہا کہ جب تک عبادت گاہوں کے ایکٹ اور وقف ایکٹ کا معاملہ حل نہیں ہوتا کورٹ کمشنر کا مطالبہ کرنے والی درخواست پر فیصلہ نہیں کیا جا سکتا۔