ہماچل پردیش میں موسلادھار بارش کے سبب اچانک آئے سیلاب کی وجہ سے پھنسے مقامی لوگوں اور سیاحوں کو نکالنے کی مہم پوری ہو گئی ہے۔ وزیر اعلیٰ سکھوندر سکھو نے ہفتہ کے روز اس کی جانکاری دی۔ انھوں نے کہا کہ تقریباً 70 ہزار سیاحوں کو نکالا گیا ہے اور تقریباً 500 سیاحوں نے اپنی مرضی سے ریاست میں رکنے کا فیصلہ کیا ہے۔
ریاست میں تقریباً 15 ہزار گاڑیاں باہر سے بھیجی گئی ہیں۔ اس کے ساتھ ہی آفت زدہ 80 فیصد علاقوں میں بجلی، پانی اور موبائل خدمات عارضی طور پر بحال کر دی گئی ہیں۔ وزیر اعلیٰ سکھو نے کہا ہے کہ بقیہ علاقوں میں ضروری خدمات جلد از جلد بحال کرنے کی کوشش کی جا رہی ہے۔ انھوں نے کامیاب بچاؤ کاری مہم کے لیے این ڈی آر ایف اور ہندوستانی فوج کی مختلف ایجنسیوں کی تعریف کی ہے۔ ہماچل پردیش میں یہ آفت بہت بڑی ہے اور سیلاب سے تقریباً 8 ہزار کروڑ روپے کے نقصان کا اندازہ ہے۔
وزیر اعلیٰ سکھوندر سکھو نے مرکزی حکومت اور ریاستی حکومت کی مختلف ایجنسیوں، این ڈی آر ایف، ہندوستانی فوج وغیرہ کے ذریعہ اس آفت میں راحت اور بچاؤ کاری کو کامیابی کے ساتھ مکمل کرنے کے لیے ان کی کوششوں کی تعریف کی۔ انھوں نے کہا کہ ریاست کے لوگ اس آفت کے وقت مضبوطی کے ساتھ کھڑے ہیں اور ریاستی حکومت بھی پوری طرح ان کے ساتھ ہے۔ وزیر اعلیٰ نے ایک بار پھر گزارش کی کہ مرکزی حکومت کو بھی ریاستی حکومت کی ہمدردی کے ساتھ مدد کرنی چاہیے۔
