پٹنہ :بہار میں بی پی ایس سی امیدواروں کا احتجاجی سلسلہ ختم ہوتا دکھائی نہیں دے رہا۔ گزشتہ تقریباً چار مہینوں سے امیدوار اپنے مطالبات پر قائم ہیں۔ اسی سلسلے میں بی پی ایس سی-ٹی آر ای-3 کے امیدوار آج پٹنہ میں احتجاجی مظاہرے کے لیے جمع ہوئے تھے۔ اطلاعات کے مطابق مظاہرین وزیر اعلیٰ کی رہائش گاہ کا گھیراؤ کرنا چاہتے تھے۔ موقع پر موجود پٹنہ پولیس نے پہلے انہیں علاقے سے ہٹنے کا انتباہ دیا، تاہم جب طلبا نے مظاہرہ جاری رکھا تو پولیس نے طاقت کا استعمال کرتے ہوئے انہیں وہاں سے زبردستی ہٹایا اور کئی مظاہرین پر لاٹھی چارج کیا گیا۔
بی پی ایس سی طلبا کے احتجاجی مظاہرہ اور ان پر پولیس کے لاٹھی چارج کا ایک ویڈیو بھی سامنے آیا ہے جس میں پٹنہ پولیس انہیں لاٹھی لے کر کھدیڑتی ہوئی نظر آ رہی ہے۔ پولیس مظاہرین طلبا پر لاٹھیاں بھی چلا رہی ہے۔ ہاتھوں میں تختیاں لیے طلبا وہاں سے اپنی جان بچا کر بھاگتے ہوئے دکھائی دیے۔ اس واقعہ میں کئی طلبا کے زخمی ہونے کی بھی خبر سامنے آ رہی ہے۔
مئی مہینے میں پڑ رہی شدید گرمی اور دھوپ کے درمیان بی پی ایس سی امیدوار پٹنہ میں وزیر اعلیٰ رہائش گاہ کا گھیراؤ کرنے کے لیے یکجا ہوئے تھے۔ ان کا مطالبہ ہے کہ وزیر اعلیٰ نتیش کمار ان سے ایک بار ملاقات کرکے ان کی بات سن لیں۔ مظاہرین کا کہنا ہے کہ ان سے گردنی باغ جانے کے لیے کہا جا رہا ہے لیکن وہاں پر ان سے ملنے کوئی بھی نہیں آتا۔ ایسے میں وہ کہاں جائیں۔
واضح رہے کہ بہار پبلک سروس کمیشن سے ٹیچروں کی تقرری ہو رہی ہے۔ تیسرے مرحلے کی ٹیچروں کی تقرری کے لیے 87774 عہدوں پر بھرتی نکلی تھی۔ 51 ہزار عہدے پر ہی پوسٹنگ ہو رہی ہے۔ وزیر تعلیم نے کچھ دنوں پہلے سپلیمنٹری رزلٹ کی یقین دہانی کرائی تھی لیکن ابھی تک کچھ ہوا ہی نہیں ہے۔
