پنجاب کے وزیر اعلی بھگونت مان نے لدھیانہ ضمنی اسمبلی انتخاب میں ’آپریشن سندور‘ کے نام پر ووٹ مانگنے پر بی جے پی کو ہدف تنقید بنایا ہے۔ مان نے پریس کانفرنس کے دوران نامہ نگاروں سے بات کرتے ہوئے کہا کہ ’’بی جے پی آپریشن سندور کے نام پر لوگوں سے ووٹ مانگ رہی ہے۔ لوگوں کے گھروں میں سندور بھیج رہی ہے۔ کیا آپ مودی کے نام کا سندور لگائیں گے؟ کوئی ون نیشن ون ہسبنڈ نام کی اسکیم چل رہی ہے کیا؟‘‘ حالانکہ بی جے پی پہلے ہی ان خبروں کی تردید کر چکی ہے، جن میں یہ کہا گیا تھا کہ پارٹی کے کارکنان گھر گھر سندور پہنچائیں گے۔
بھگونت مان کے مذکورہ بیان پر بی جے پی نے جوابی حملہ کیا ہے۔ پنجاب بی جے پی کے ترجمان پریت پال سنگھ بالیوال نے سوشل میڈیا پلیٹ فارم ’ایکس‘ پر بھگونت مان کے بیان کی ویڈیو شیئر کرتے ہوئے کہا کہ ’’آپریشن سندور کا مذاق اڑاتے ہوئے وہ بے شرمی سے پوچھتے ہیں کیا آپ مودی کے نام کا سندور لگائیں گے؟ کیا یہ ون نیشن، ون ہسبنڈ ہے۔‘‘ ساتھ ہی انہوں نے کہا کہ ہر گھر سندور بھیجنے سے متعلق بی جے پی کا فی الحال کوئی ارادہ نہیں ہے۔
قابل ذکر ہے کہ 22 اپریل کو جموں و کشمیر کے پہلگام میں دہشت گردوں نے 26 سیاحوں کو موت کے گھاٹ اتار دیا تھا۔ خفیہ ایجنسی کے ذریعہ دی گئی جانکاری میں میں یہ بات سامنے آئی تھی کہ اس دہشت گردانہ حملہ کے پیچھے پاکستان میں پرورش پا رہے دہشت گردوں کا ہاتھ ہے۔ اس کے بعد ہندوستان نے پاکستان پر سختی کرتے ہوئے کئی اہم فیصلے لیے تھے، جس میں سب سے اہم ’سندھ آبی معاہدہ‘ کی معطلی تھا۔ اس کے بعد 7 مئی کو دیر رات ہندوستان نے ’آپریشن سندور‘ کے تحت پاکستان پر سرجیکل اسٹرائک کر دیا تھا۔ اس اسٹرائک کے دوران پاکستان میں موجود دہشت گردوں کے کچھ ٹھکانوں کو نیست و نابود کر دیا گیا تھا، اس آپریشن میں 100 سے زائد دہشت گرد مارے گئے تھے۔
