متھرا کی شاہی عیدگاہ مسجد پر الہ آباد ہائی کورٹ کا فیصلہ محفوظ

الہ آباد:الہ آباد ہائی کورٹ نے پیر کے روز متھرا کی شاہی عیدگاہ مسجد کو "ہٹانے” کی درخواست کرنے والی ایک پی آئی ایل پر اپنا فیصلہ محفوظ کر لیا جس میں عرضی گزار نے دعویٰ کیا کہ یہ عیدگاہ کرشن جنم بھومی یا بھگوان کرشن کی جائے پیدائش پر تعمیر ہوئی ہے۔
چیف جسٹس پرتینکر دیواکر اور جسٹس آشوتوش سریواستو پر مشتمل ایک ڈویژن بنچ نے مہیک مہیشوری کی طرف سے دائرپی آئی ایل کی سماعت کے بعد فیصلہ محفوظ کر لیا۔ہائی کورٹ نے 23 اگست کو اس کیس کی سماعت 4 ستمبر تک ملتوی کر دی تھی۔پی آئی ایل نے شاہی عیدگاہ مسجد کو ہٹانے کی مانگ کی ہے، یہ الزام لگاتے ہوئے کہ یہ کرشن کی پیدائش کی جگہ پر بنائی گئی ہے۔
عرضی گزار نے زمین کو ہندوؤں کے حوالے کرنے اور کرشن جنم بھومی زمین پر مندر بنانے کے لیے ایک مناسب ٹرسٹ تشکیل دینے کی درخواست کی ہے۔ ایک عبوری عرضی میں،درخواست گزار نے درخواست کے نمٹانے تک ہندوؤں کو ہفتے کے مخصوص دنوں اور جنم اشٹمی کے تہوار (بھگوان کرشن کے جنم دن کی تقریبات) کے دوران مسجد میں عبادت کرنے کی اجازت بھی مانگی ہے۔
درخواست گزار نے الزام لگایا کہ بھگوان کرشن کی پیدائش بادشاہ کنس کی کارگر (جیل) میں ہوئی تھی اور ان کی پیدائش کا مقام شاہی عیدگاہ ٹرسٹ کے زیر تعمیر موجودہ ڈھانچے کے نیچے ہے۔ درخواست گزار نے آرکیالوجیکل سروے آف انڈیا (اے ایس آئی) کے ذریعہ "متنازعہ ڈھانچے” کی عدالت کی نگرانی میں کھدائی کے لئے بھی درخواست کی ہے۔