یوپی حکومت میں وزیر نند گوپال نندی کے بیٹے ابھشیک اور بہو کنشکا خوفناک حادثہ کا شکار

لکھنئو:اتر پردیش حکومت میں وزیر نند گوپال نندی کے بیٹے ابھشیک اور بہو کنشکا لکھنؤ-آگرہ ایکسپریس وے پر ایک خوفناک حادثہ کا شکار ہو گئے ہیں۔ حادثہ کے بعد دونوں کو قریبی اسپتال میں داخل کروایا گیا، لیکن حالت سنگین ہونے کی وجہ سے بعد میں انھیں لکھنؤ پی جی آئی منتقل کر دیا گیا۔ حادثہ کی خبر ملنے کے بعد ضلع مجسٹریٹ سبھرانت جائے واقعہ پر پہنچے۔ انھوں نے ابھشیک اور کنشکا دونوں کو قریبی اسپتال میں داخل کروایا۔ حادثہ اس قدر خوفناک تھا کہ گاڑی کے آگے کا حصہ بری طرح سے ٹوٹ پھوٹ گیا۔ کنشکا کی ناک پر شدید چوٹ لگنے کی خبر بھی سامنے آ رہی ہے۔
بتایا جا رہا ہے کہ ابھشیک اور کنشکا کسی کام سے لکھنؤ جا رہے تھے۔ حادثہ کے وقت گاڑی ابھشیک چلا رہے تھے۔ کسی وجہ سے گاڑی سے ان کا کنٹرول ختم ہو گیا، اور پھر گاڑی تیز رفتاری کے ساتھ ڈیوائیڈر سے جا ٹکرائی۔ گاڑی جب ایکسپریس وے پر 184 کلومیٹر پر پہنچی تو اچانک آؤٹ آف کنٹرول ہو کر ڈیوائیڈر سے جا ٹکرائی۔ حادثہ کی شدت کا اندازہ اس بات سے لگایا جا سکتا ہے کہ وہاں پر موجود تین درخت بھی ٹوٹ گئے اور بجلی کا ایک کھمبا بھی ٹوٹ گیا۔
واضح رہے کہ ایک ہفتہ قبل ہی نندی گوپال نندی کے بیٹے ابھشیک کی شادی ہوئی تھی۔ اس میں اتر پردیش کے وزیر اعلیٰ یوگی آدتیہ ناتھ سمیت کئی وزراء بھی شامل ہوئے تھے۔ وزیر اعلیٰ نے نو شادی شدہ جوڑے کو دعائیں بھی دی تھیں۔ شادی کی یہ تقریب کشمیر کے سری نگر واقع ڈل جھیل کی وادیوں میں منعقد ہوئی تھی۔