وزیراعظم نریندر مودی نے اساتذہ سے کہا کہ وہ صرف کتابوں اور طے شدہ نصاب تک محدود نہ رہیں، بلکہ اپنے طلباء کی زندگی، ان کی دلچسپیوں اور پریشانیوں کو بھی سمجھنے کی کوشش کریں۔ یوم اساتذہ سے ایک روز قبل 7، لوک کلیان مارگ پر قومی اساتذہ ایوارڈ حاصل کرنے والے اساتذہ سے گفتگو کے دوران وزیر اعظم مودی نے کہا کہ تعلیم صرف کتابوں اور کلاس روم تک محدود نہیں ہے۔ انہوں نے کہا کہ اساتذہ بچوں کو بہتر طریقے سے سمجھیں اور ان کی روزمرہ زندگی سے وابستہ مسائل سے نمٹنے میں بچوں کی مدد کریں۔ وزیراعظم مودی نے کہا کہ ہمیں کتابوں سے باہر نکلنا ہوگا، ہمیں نصاب سے باہر نکلنا ہوگا۔ ہمیں بچوں کی زندگی میں داخل ہونا ہوگا۔ انہوں نے مزید کہا کہ یہ یقینی بنانے میں اساتذہ کا اہم کردار ہے کہ بچے بچپن سے وابستہ تجسس، تخلیقی صلاحیت اور کھلے پن کو نہ کھوئیں۔ انہوں نے مزید کہا کہ بچپن کو مرنے نہیں دینا چاہیے۔
گفتگو کے دوران وزیر اعظم مودی نے اساتذہ سے پوچھا کہ کیا وہ ان بچوں کی خوبیوں کو پہچاننے کی کوشش کرتے ہیں، جو پڑھائی میں بہتر کارکردگی پیش نہیں کر پاتے۔ وزیر اعظم مودی نے کہا کہ ممکن ہے کوئی بچہ پڑھائی میں اچھا نہ ہو، لیکن خدا نے ہر بچے کو کوئی نہ کوئی خاص صلاحیت دی ہے۔ انہوں نے اساتذہ سے اس صلاحیت کو پہچاننے کی کوشش کرنے کو کہا۔ ایک استاذ نے جواب دیا کہ ہر بچے میں الگ الگ خوبیاں، صلاحیتیں اور چیلنجز ہوتے ہیں۔ اساتذہ کا کام ہوتا ہے کہ بچوں کی ان خوبیوں کو پہچان کر انہیں آگے بڑھائیں۔ گفتگو میں یہ بھی بتایا گیا کہ اساتذہ بچوں کا اعتماد اور ہنر بڑھانے کے لیے کلاس روم سے باہر بھی مختلف سرگرمیاں کراتے ہیں۔
وزیر اعظم مودی نے ایک استاذ سے اچھا بولنے کے طریقے بھی دریافت کیے۔ انہوں نے بتایا کہ اچھا مقرر بننے کے لیے اعتماد اور مسلسل مشق ضروری ہے۔ گفتگو کے دوران وزیراعظم نریندر مودی نے بچوں کے بڑھتے ہوئے اسکرین ٹائم کے مسئلے پر بھی تشویش کا اظہار کیا۔ انہوں نے اساتذہ سے بچوں کو کھیل کود، جسمانی اور تخلیقی سرگرمیوں کے لیے حوصلہ افزائی کرنے کو کہا، تاکہ بچے موبائل اور دیگر ڈیجیٹل آلات پر کم وقت گزاریں۔ انہوں نے کہا کہ بچوں کو ایسی سرگرمیوں میں شامل کرنا ضروری ہے، جس سے ان کا اعتماد اور سماجی اسکل بہتر ہو۔ اس موقعے پر تعلیم کے علاوہ مختلف موضوعات پر گفتگو کی گئی۔
ایک خاتون ٹیچر نے بریسٹ کینسر سے متعلق خواتین کو بیدار کرنے کے لیے اپنے کام کے بارے میں بتایا۔ انہوں نے کہا کہ بیداری اور ابتدائی جانچ سے خواتین کو وقت پر ڈاکٹر سے مشورہ لینے میں مدد مل سکتی ہے۔ طلباء میں منشیات کے حوالے سے بیداری پر بھی بات ہوئی۔ وزیر اعظم مودی نے کہا کہ اساتذہ کو بچوں میں ہونے والی تبدیلیوں پر توجہ دینی چاہیے اور ان کے مسائل کو سمجھنا چاہیے۔ وزیر اعظم مودی نے کہا کہ ٹیچر کا کام صرف نصاب مکمل کرانا اور بچوں کو امتحان کے لیے تیار کرنا نہیں ہے، بلکہ بچوں کو قریب سے سمجھنا، ان کی خوبیوں کو پہچاننا اور ان کے مسائل کو جاننا بھی ہے۔ انہوں نے کہا کہ اساتذہ بچوں کو گفتگو کے آداب سکھائیں، تخلیقی انداز میں سوچنے اور اعتماد بڑھانے جیسی اسکلز کو فروغ دینے کے مواقع بھی فراہم کرنے چاہئیں۔ وزیر اعظم مودی نے قومی اساتذہ ایوارڈ حاصل کرنے والے اساتذہ کو مبارکباد دی اور کہا کہ بچوں کا مستقبل بہتر بنانے میں اساتذہ کی اہم ذمہ داری ہے۔
