آج صبح دہلی پولیس نے ’کاکروچ جنتا پارٹی‘ (سی جے پی) کو جنتر منتر پر مظاہرہ کرنے کی اجازت دے دی، جس کے بعد بڑی تعداد میں نوجوان جنتر منتر کی طرف بڑھتے ہوئے دکھائی دیے۔ ایڈیشنل ڈپٹی کمشنر پولیس دفتر کی طرف سے جاری خط کے مطابق ابھجیت دیپکے کی طرف سے دی گئی درخواست پر 6 جون 2026 کو صبح 10 بجے سے شام 5 بجے تک دھرنا و مظاہرہ کی منظوری دی گئی۔ یہ اجازت ایک بار کی خصوصی چھوٹ کے طور پر دی گئی ہے۔ پولیس نے کہا کہ مظاہرہ سپریم کورٹ کی ہدایات اور طے شدہ اصولوں کے تحت منقد ہو ۔
دہلی پولیس سے مظاہرہ کی اجازت ملنے کے بعد ابھجیت دیپکے سیکورٹی انتظامات کے درمیان جنتر منتر پہنچے اور مظاہرہ میں شامل ہوئے۔ اس مظاہرہ میں کئی نوجوان کاکروچ بنا ہوا ماسک پہن کر ہاتھوں میں پھول لیے دکھائی دیے۔ اسکولی طلبا بھی بڑی تعداد میں اپنے سرپرستوں کے ساتھ جنتر منتر پہنچے، جن کے ہاتھوں میں ترنگا اور کتاب موجود تھا۔ مظاہرین مرکزی وزیر تعلیم دھرمیندر پردھان کے استعفیٰ کا مطالبہ کرتے ہوئے نعرے بازی کرتے ہوئے دکھائی دیے۔ وہ ہاتھوں میں ایسے بینرس بھی لیے تھے جس پر دھرمیندر پردھان سے استعفیٰ مانگا گیا تھا۔ ابھجیت دیپکے نے اس مظاہرہ کو پُرامن اور ڈسپلن میں جاری رکھنے کی لوگوں سے اپیل کی اور کہا کہ کسی بھی طرح کے تشدد سے خود کو محفوظ رکھیں۔
واضح رہے کہ یہ مظاہرہ نیٹ 2026 پیپر لیک اور سی بی ایس ای کے آن اسکرین مارکنگ سسٹم میں مبینہ بے ضابطگیوں کے خلاف کیا جا رہا ہے۔ اس مظاہرہ کو کئی بڑی ہستیوں کی حمایت بھی حاصل ہوئی ہے، جن میں سماجی کارکن سونم وانگچک بھی شامل ہیں۔ کاکروچ جنتا پارٹی کے بانی ابھجیت دیپکے نے مظاہرہ کی حمایت کرنے والوں کا شکریہ ادا کیا ہے اور اپیل کی ہے کہ سبھی امن و امان کے ساتھ احتجاجی مظاہرہ کو کامیاب بنائیں۔ انھوں نے اپنے بیان میں کہا کہ ’’سوشل میڈیا پوسٹ ہٹائی جا سکتی ہیں، لیکن ہمیں ختم نہیں کیا جا سکتا۔ ایک ماہ سے ہم وزیر تعلیم دھرمیندر پردھان کے استعفیٰ کا مطالبہ کر رہے ہیں۔ حکومت کارروائی کرنے کی جگہ اکاؤنٹ ہیک اور پوسٹ ڈیلیٹ کرانے میں مصروف ہے۔‘‘ ساتھ ہی انھوں نے کہا کہ یہ جنگ طویل چلنے والی ہے اور وہ پیچھے ہٹنے والے نہیں ہیں۔
