جماعت اسلامی ہند نے دہلی آتشزدگی سانحہ پر تعزیت کا کیا اظہار

نئی دہلی: جماعت اسلامی ہند کے نائب امیر پروفیسر سلیم انجینئر نے دہلی کے مالویہ نگر میں واقع ایک ہوٹل میں پیش آنے والے آتشزدگی کے المناک حادثے پر اپنے گہرے رنج و غم کا اظہار کیا ہے ۔ اس حادثے میی 21 افراد کی ہلاکت پر اپنی تعزیت کا اظہار کیا ہے ۔
میڈیا کے لیے جاری اپنے بیان میں پروفیسر سلیم انجینئر نے کہا کہ میں متاثرہ خاندانوں کے افراد سے دلی تعزیت کا اظہار کرتا ہوں اور دعا کرتا ہوں کہ اللہ تعالیٰ متاثرہ افراد کو صبر و حوصلہ عطا فرمائے۔ میں زخمیوں کی جلد صحت یابی کے لیے بھی دعاگو ہوں۔ یہ افسوسناک واقعہ حفاظتی اصولوں پر عمل درآمد اور ان کے نفاذ میں سنگین کوتاہیوں کو ظاہر کرتا ہے۔ اطلاعات کے مطابق ہوٹل میں بنیادی فائر سیفٹی انتظامات کا فقدان تھا اور مہمانوں کو مقررہ گنجائش سے کہیں زیادہ کمروں میں ٹھہرایا جا رہا تھا، جو حفاظتی انتظامات اور ضوابط کی سخت خلاف ورزی ہے ۔
جماعت اسلامی ہند کے نائب امیر نے مزید کہا کہ اس قسم کی سنگین کوتاہیاں عام شہریوں، طلبہ، ملازمت پیشہ افراد اور سیاحوں کی زندگیوں کو شدید خطرے میں ڈال رہی ہیں، خاص کر گنجان آبادی والے شہری علاقوں میں صورت حال انتہائی تشویش ناک ہے۔ سلیم انجینیئر نے کہا کہ اگرچہ امدادی اور ریسکیو کارروائیاں قابل ستائش ہیں لیکن طویل مدتی حفاظتی اقدامات کو ترجیح دینا بھی نہایت ضروری ہے۔ اس قسم کے تمام مقامات پر حفاظتی انتظامات اور ضوابط کی پابندی کا سنجیدگی سے جائزہ لیا جانا چاہیے۔ قوانین پر سختی سے عمل درآمد ہونا چاہیے اور خلاف ورزیوں پر سخت قانونی کارروائی کی جانی چاہیے۔ شہری ترقی کو عوامی تحفظ، شفافیت اور ذمہ دارانہ طرزِ حکمرانی کی بنیاد پر آگے بڑھایا جانا چاہیے۔ یہ بھی ضروری ہے کہ ایسے المناک واقعات موثر اصلاحات کا سبب بنیں، جو حفاظتی نظام کو مضبوط کریں اور اس بات کو یقینی بنائیں کہ انسانی جانوں کا تحفظ تمام ترقیاتی اور انتظامی عمل کا اولین مقصد رہے۔