آئندہ مغربی بنگال اسمبلی انتخاب کے لیے ترنمول کانگریس (ٹی ایم سی) نے 291 سیٹوں پر امیدواروں کے نام کا اعلان کر دیا ہے۔ وزیر اعلیٰ ممتا بنرجی نے کہا کہ 3 سیٹوں پر انیت تھاپا کی قیادت والی بھارتیہ گورکھا پرجاتانترک مورچہ (بی جی پی ایم) دارجلنگ میں انتخاب لڑے گی۔ وزیر اعلیٰ ممتا بنرجی اس بار بھوانی پور سے انتخاب لڑیں گی جہاں ان کا براہ راست مقابلہ بی جے پی کے سویندو ادھیکاری سے ہوگا۔ انہوں نے ٹی ایم سی کی فہرست جاری کرتے ہوئے کہا کہ ’’الیکشن کمیشن بی جے پی کی جانب سے ’اچھا کھیل‘ کھیل رہا ہے۔ انہیں براہ راست بی جے پی کے لیے مہم چلانی چاہیے۔‘‘ ساتھ ہی انہوں نے دعویٰ کیا کہ ٹی ایم سی 2026 میں بنگال میں ہونے والے اسمبلی انتخاب میں 226 سے زائد سیٹوں پر جیت حاصل کرے گی۔
وزیر اعلیٰ ممتا بنرجی 2021 اسمبلی انتخاب میں نندی گرام سیٹ سے بی جے پی کے سویندو ادھیکاری سے انتخاب ہار گئی تھیں۔ اس کے بعد وہ بھوانی پور سے ضمنی اسمبلی انتخاب میں جیت حاصل کر اسمبلی پہنچی تھی۔ اس بار انہوں نے نندی گرام سیٹ سے انتخاب نہ لڑنے کا فیصلہ کیا ہے۔ ٹی ایم سی نے نندی گرام سے آج ہی پارٹی میں شامل ہوئے پبترا کار کو ٹکٹ دیا ہے۔ وہ اپوزیشن لیڈر سویندو ادھیکاری کے قریبی ساتھی تھے اور انہوں نے 2021 کے اسمبلی انتخاب میں سویندو ادھیکاری کی جیت میں اہم کردار ادا کیا تھا۔ انہیں 2021 میں ٹی ایم سی کارکن کے قتل کے سلسلے میں گرفتار کیا گیا تھا۔
ٹی ایم سی نے مرشدآباد ضلع کی بھرت پور سیٹ سے مستفیض الرحمٰن کو میدان میں اتارا ہے۔ اس سیٹ سے ہمایوں کبیر رکن اسمبلی تھے، جنہوں نے بابری تنازعہ کھڑا کیا تھا۔ ٹی ایم سی نے کالیمپونگ، کرسیونگ اور دارجلنگ سیٹ انیت تھاپا کی قیادت والی بی جی پی ایم کے لیے چھوڑ دی ہے۔ پارٹی نے چندریما بھٹاچاریہ کو دم دم شمالی، مدن مترا کو کمرہاٹی، فرہاد حکیم کو کولکاتہ پورٹ، کنال گھوش کو بیلے گھاٹا، ڈاکٹر ششی پانجا کو شیام پوکر اور جیوتی پریو ملّک کو ہابرا سیٹ سے انتخابی میدان میں اتارا ہے۔ ابھیشیک بنرجی نے کہا کہ مغربی بنگال انتخاب میں ٹی ایم سی کے 291 امیدواروں میں سے 52 خواتین، 95 درج فہرست ذات اور درج فہرست قبائل اور 47 اقلیتی طبقہ سے تعلق رکھتے ہیں۔
الیکشن کمیشن کے مطابق آسام، کیرالہ اور پڈوچیری میں ایک ہی مرحلے میں 9 اپریل کو ووٹنگ ہوگی، جبکہ مغربی بنگال میں 2 مرحلوں میں 23 اور 29 اپریل کو پولنگ کرائی جائے گی۔ تمل ناڈو میں بھی ایک مرحلے میں 23 اپریل کو ووٹ ڈالے جائیں گے۔ تمام ریاستوں اور مرکز کے زیر انتظام خطے کے انتخابی نتائج 4 مئی کو جاری کیے جائیں گے۔
