ہندوستان کے قومی ترانے ’وندے ماترم‘ کے 150 سال مکمل ہونے پر پارلیمنٹ کے سرمائی اجلاس میں اس ہفتہ کے آخر میں خصوصی بحث کا انعقاد کیا جائے گا۔ لوک سبھا میں اس بحث کے لیے 10 گھنٹے کا وقت مقرر کیا گیا ہے، جس میں وزیر اعظم نریندر مودی بھی حصہ لیں گے۔ لوک سبھا کی بزنس ایڈوائزری کمیٹی کی میٹنگ میں حکومت نے ’وندے ماترم‘ پر بحث کو ترجیح دی، جبکہ کانگریس نے ایس آئی آر اور انتخابی اصلاحات پر بحث کا مطالبہ کیا تھا۔ حالانکہ ٹی ایم سی نے وندے ماترم پر لوک سبھا میں خصوصی بحث کی حمایت کی ہے۔ قابل ذکر ہے کہ قبل میں مرکزی حکومت نے وندے ماترم کے 150 سال مکمل ہونے کے موقع پر ایک خصوصی یادگاری سکہ اور ڈاک ٹکٹ جاری کیا تھا۔
واضح رہے کہ گزشتہ ماہ 7 نومبر کو ’وندے ماترم‘ گیت کے 150 سال مکمل ہونے پر دہلی میں ایک پروگرام کا انعقاد ہوا تھا، جس میں وزیر اعظم نریندر مودی نے الزام عائد کیا تھا کہ کانگریس پارٹی نے اس گیت کے ساتھ چھیڑ چھاڑ کی ہے۔ وزیر اعظم مودی کا کہنا تھا کہ ’’بدقسمتی سے 1937 میں نہرو کی قیادت میں کانگریس پارٹی نے اصل وندے ماترم گیت سے اہم حصے کو ہٹا دیا تھا۔ وندے ماترم کو ٹکڑوں میں تقسیم کر دیا گیا۔ اس نے تقسیم کے بیج بھی بو دیے تھے، یہ ناانصافی کیوں کی گئی؟
وزیر اعظم نریندر مودی کے بیان پر کانگریس کے جنرل سکریٹری جے رام رمیش نے جوابی حملہ کرتے ہوئے ان پر 1937 کی کانگریس ورکنگ کمیٹی (سی ڈبلیو سی) اور رویندر ناتھ ٹیگور کی توہین کا الزام عائد کیا تھا۔ انہوں نے سوشل میڈیا پلیٹ فارم ’ایکس‘ پر لکھا تھا کہ ’’وزیر اعظم کا سی ڈبلیو سی اور ٹیگور کی توہین کرنا افسوسناک ہے، لیکن حیران کرنے والا نہیں۔ ایسا اس لیے کہ آر ایس ایس نے مہاتما گاندھی کی قیادت والی جدوجہد آزادی میں کوئی کردار ادا نہیں کیا تھا۔‘‘
جے رام رمیش نے پوسٹ میں یہ بھی لکھا کہ ’’26 اکتوبر سے یکم نومبر 1937 تک کولکاتہ میں کانگریس ورکنگ کمیٹی کی میٹنگ ہوئی تھی، جس میں گاندھی جی، نہرو، پٹیل، بوس، راجیندر پرساد، مولانا آزاد، سروجنی نائیڈو، جے بی کرپلانی، بھولابھائی دیسائی، جمنالال بجاج اور نریندر دیو سمیت کئی سینئر لیڈران شامل ہوئے تھے۔‘‘ وہ آگے لکھتے ہیں کہ ’’28 اکتوبر 1937 کو وندے ماترم پر سی ڈبلیو سی کا بیان جاری ہوا تھا، جو گرودیو رویندر ناتھ ٹیگور کے مشورے سے کافی متاثر تھا۔ وزیر اعظم نے اس تاریخی کمیٹی اور ٹیگور دونوں کی توہین کی ہے۔
