نئی دہلی:اتراکھنڈ میں چار دھام یاترا 24 گھنٹوں کے لیے روک دی گئی ہے۔ محکمہ موسمیات نے اتراکھنڈ میں شدید بارش کا ریڈ الرٹ جاری کیا ہے۔ اس کے پیش نظر انتظامیہ کافی احتیاط برت رہی ہے اور فوری طور پر اس یاترا کو 24 گھنٹوں کے لیے روک دینے کا فیصلہ کیا ہے۔ اطلاع کے مطابق چار دھام راستے پر جگہ جگہ لینڈ سلائیڈ کے واقعات میں اضافہ ہوا ہے۔ ایسے میں مسافروں اور عقیدت مندوں کو مستعد رہنے اور توجہ سے سفر کرنے کی اپیل کی جا رہی ہے۔
محکمہ موسمیات کے مطابق اتراکھنڈ کے کئی حصوں میں اگلے 24 سے 48 گھنٹوں میں شدید بارش کا امکان ہے۔ اس وجہ سے چار دھام راستوں پر خطرہ بڑھ گیا ہے۔ بدری ناتھ، کیدار ناتھ، گنگوتری اور یمونوتری جیسے اہم تیرتھ استھلوں کی طرف جانے والے راستوں پر لینڈ سلائیڈ اور سڑک جام کے معاملے سامنے آ رہے ہیں۔ انتظامیہ نے مسافروں کی تحفظ کو اولیت دیتے ہوئے یاترا پر فی الحال روک لگانے کا اعلان کیا ہے۔
محکمہ موسمیات نے چمولی، رودر پریاگ، اترکاشی اور پتھوڑا گڑھ جیسے ضلعوں میں بارش کو لے کر ریڈ الرٹ جاری کیا ہے۔ ان علاقوں میں شدید بارش کے ساتھ ساتھ سیلاب اور لینڈ سلائیڈ کا خطرہ بنا ہوا ہے۔ انتظامیہ نے ندیوں اور آبی ذخائر کے آس پاس رہنے والے لوگوں کو بھی مستعد رہنے کی صلاح دی ہے۔
