پٹنہ :اسمبلی انتخاب 2025 کی انتظامی تیاریاں ضلعی سطح پر شروع کر دی گئی ہیں۔ انتخاب کے پیش نظر ووٹر لسٹ میں نام شامل کرنے کا کام تو پہلے سے ہی چل رہا تھا، اب انتخاب کو بہتر طریقہ سے کرانے کے لیے ضلعی انتخابی افسر مع ضلع مجسٹریٹ نے کئی سیل کی تشکیل کی ہے۔ تشکیل شدہ سیل کے ضلعی سطح پر نوڈل اور سینئر افسران بھی نامزد کر دیے گئے ہیں۔ ساتھ ہی نوڈل اور سینئر افسران کو الیکشن کمیشن سے موصول ہونے والی ہدایات سے بھی باخبر رہنے کا حکم دیا گیا ہے۔ تاکہ سیل کے انتظام و انصرام میں کسی قسم کی کوئی پریشانی نہ آئے۔ اسمبلی انتخاب کے کامیاب انعقاد کے لیے ڈی ایم نے تمام محکموں کو آپس میں مل کر کام کرنے کا حکم دیا ہے۔
18 جون کو بیگوسرائے کے ڈی ایم تشار سنگلا اور پولیس سپرنٹنڈنٹ منیش نے انتخابی تیاریوں کے سلسلے میں افسران کے ساتھ ایک اہم میٹنگ کی۔ اس دوران کئی اہم ہدایت بھی دی گئیں اور مختلف معاملوں پر سنجیدہ گفتگو بھی ہوئیں۔ میٹنگ کی صدارت کر رہے ڈسٹرکٹ الیکشن افسر-کم-ڈسٹرکٹ مجسٹریٹ تشار سنگلا نے کہا کہ ’’انتخاب کو پُرامن اور غیر جانبدار طریقہ سے مکمل کرانا ہم تمام کی ذمہ داری ہے۔‘‘ ساتھ ہی انہوں نے تمام الیکشن رجسٹریشن افسر کو ہدایت دی کہ ہر ایک اسمبلی حلقہ میں 20 ماڈل انتخابی مراکز کی نشاندہی کر اس کی تیاری وقت رہتے یقینی بنائیں۔
تشار سنگلا نے مزید کہا کہ تمام سیل کے سینئر افسران اپنے اپنے محکمہ کے عملوں کے ساتھ میٹنگ کر لیں۔ اگر کسی محکمہ میں عملوں کی کمی ہو تو فوری طور پر اس کا مطالبہ کریں، تاکہ وقت رہتے انسانی وسائل دستیاب کرائے جا سکیں۔ واضح ہو کہ چیف سکریٹری کی صدارت میں 26 جون کو مونگیر ڈویژن میں انتخاب سے متعلق جائزہ میٹنگ ہوگی۔ اس کے لیے ڈی ایم نے تمام سیل کے افسران کو اپنے اپنے محکمہ کی رپورٹ تیار کرنے کا حکم دیا ہے۔
میٹنگ میں تمام انتخابی مراکز پر الیکشن کمیشن کے ذریعہ مقرر کردہ بنیادی سہولیات (اے ایم ایف) اس کے لیے متعلقہ افسران کو ضروری کارروائی کرنے کو کہا گیا ہے۔ ساتھ ہی ڈی ایم نے ضلعی تعلیمی افسر کو حکم دیا کہ وہ تمام اسکولوں کے پرنسپلز کے ساتھ میٹنگ کر کے انتخابی مراکز پر دستیاب سہولیات کو یقینی بنائیں۔ اس کے علاوہ انتخاب کے لیے تعینات تمام سرکاری اہلکاروں کا ڈیٹا بیس تیار کرنے کا بھی حکم دیا گیا ہے۔
