’ساون کے آخری سوموار‘ پر آج مدھے پورہ کے مشہور سنگھیشور مندر میں عقیدت مندوں کی بھاری بھیڑ کے باعث افراتفری کی صورتحال بن گئی۔ صبح تقریباً 8 بجے کے بعد ’جلابھیشیک‘ کے لیے عقیدت مندوں کی تعداد میں اچانک اضافہ ہونے لگا۔ اس دوران دھکا-مکی شروع ہو گئی اور قطار ٹوٹنے سے بھگدڑ جیسی صورتحال پیدا ہو گئی۔ بھیڑ کے دباؤ میں انتظامیہ کی بیریکیڈنگ بھی ٹوٹ گئی۔ اس دوران تقریباً نصف درجن سے زائد عقیدت مند گر کر زخمی ہو گئے۔ بھیڑ کو کنٹرول کرنے کے دوران ڈیوٹی پر تعینات ایک پولیس اہلکار بھی زخمی ہو گئے۔ بتایا گیا کہ بھیڑ کے دباؤ میں ان کی وردی تک پھٹ گئی۔ تمام زخمیوں کو فوری طور پر جے این کے ٹی میڈیکل کالج اسپتال پہنچایا گیا، جہاں ان کا علاج چل رہا ہے۔
رپورٹس کے مطابق اتوار کی رات تقریباً 1 بجے آفیشیل پوجا ہونے کے بعد مندر کا دروازہ عقیدت مندوں کے لیے کھلا۔ اس کے بعد بڑی تعداد میں عقیدت مند ’جلابھیشیک‘ کے لیے مندر کے احاطے میں پہنچنے لگے۔ آہستہ آہستہ بھیڑ بڑھتی گئی صبح تقریباً 8 بجے کے بعد ’جلابھیشیک‘ کے لیے آنے والے عقیدت مندوں کی تعداد میں مزید اضافہ ہو گیا۔ اس کے بعد قطار میں دھکا-مکی شروع ہو گئی اور دیکھتے ہی دیکھتے صورتحال بگڑنے لگی۔ بھیڑ کے بڑھتے دباؤ کی وجہ سے انتظامیہ کی جانب سے لگائی گئی بیریکیڈنگ بھی ٹوٹ گئی۔
صورتحال بگڑنے کی اطلاع ملتے ہی مدھے پورہ کے ڈی ایم، ایس پی، ایس ڈی ایم اور ایس ڈی پی او سمیت انتظامیہ اور پولیس افسران موقع پر پہنچے۔ پولیس کی اضافی نفری بھی بلائی گئی۔ اس کے بعد انتظامیہ کی ٹیم نے بھیڑ کو کنٹرول کیا اور عقیدت مندوں کو دوبارہ قطار میں لگا کر ’جلابھیشیک‘ شروع کرایا۔ افسران نے بھیڑ کو منظم کرنے کے ساتھ ساتھ عقیدت مندوں کی سیکورٹی کو ترجیح دیتے ہوئے موقع پر حالات کو کنٹرول میں کر لیا۔ مندر ٹرسٹ کمیٹی اور انتظامیہ کی جانب سے عقیدت مندوں سے صبر اور امن برقرار رکھنے کی اپیل بھی کی گئی۔
قابل ذکر ہے کہ واقعہ کے بعد زخمی عقیدت مندوں کو فوری طور پر جے این کے ٹی میڈیکل کالج اسپتال پہنچایا گیا۔ زخمیوں میں سہرسہ کے سونبرسا تھانہ حلقہ کے جلسیما وارڈ-4 کی رونا دیوی، سپول کے مان گنج کے سنٹو کمار، سپاہی سدھانت کمار اور سلینا دیوی شامل ہیں۔ انتظامیہ کی جانب سے صورتحال پر مسلسل نظر رکھی جا رہی ہے۔
