بہار کے مغربی چمپارن ضلع کے لوریا تھانہ علاقے میں ہفتے کی صبح ایک دردناک سڑک حادثہ پیش آیا، جس میں 5 افراد کی موت ہو گئی، اور کئی افراد زخمی بتائے جا رہے ہیں۔ حادثہ این ایچ-727 پر بیتیا-لوریا شاہراہ پر بنکٹوا کے قریب پیش آیا۔ بتایا جا رہا ہے کہ تیز رفتار اور بے قابو شاہی ٹریولز کی بس سڑک کنارے موجود لوگوں کی بھیڑ میں گھس گئی۔ اطلاع کے مطابق بنکٹوا میں ایک گھر میں چھٹیار تقریب کا انعقاد کیا گیا تھا۔ تقریب میں آرکیسٹرا کا پروگرام جاری تھا۔ اسی دوران گورکھپور سے بیتیا جا رہی شاہی ٹریولز کی تیز رفتار بس اچانک بے قابو ہو گئی اور وہاں موجود لوگوں کو کچلتے ہوئے آگے نکل گئی۔
حادثے میں 5 افراد کی موقع پر ہی موت ہو گئی، جبکہ کئی لوگ زخمی بتائے جا رہے ہیں۔ ہلاک ہونے والوں کی شناخت دیویندر دوبے، سنجے مہتو، بہادر مہتو، بھولا دوبے اور چھانگور رام کے طور پر ہوئی ہے۔ حادثے کے بعد جائے حادثہ پر افرا تفری کا ماحول تھا۔ مقامی لوگوں نے زخمیوں کو فوری طور پر علاج کے لیے بھیجنے کی کوشش کی۔ اطلاع ملتے ہی لوریا تھانہ پولیس سمیت کئی تھانوں کی پولیس موقع پر پہنچی اور صورتحال کو قابو میں کیا۔
پولیس نے مقامی لوگوں کو قابو میں کیا اور تمام لاشوں کو پوسٹ مارٹم کے لیے بیتیا میں واقع ’جی ایم سی ایچ‘ بھیج دیا۔ حادثے کے بعد مشتعل لوگوں نے کئی بسوں کے شیشے، پنڈال اور کچھ گاڑیوں کو نقصان پہنچایا۔ پولیس نے موقع پر پہنچ کر صورتحال کو قابو میں کیا۔ حادثے کے بعد پورے علاقے میں سوگ اور کشیدگی کا ماحول ہے۔ پولیس نے معاملے کی تفتیش شروع کر دی ہے۔ حادثے کی وجوہات اور بس ڈرائیور کے کردار کی جانچ کی جا رہی ہے۔ عینی شاہدین اور مقامی لوگوں سے بھی معلومات اکٹھی کی جا رہی ہیں۔
