شملہ: ہماچل پردیش کے وزیر اعلی سکھویندر سنگھ سکھو نے جمعرات کو سیلاب سے متاثرہ کلو اور لاہول سپیتی اضلاع میں چلائی جا رہی راحت اور بچاؤ کارروائیوں پر اطمینان کا اظہار کرتے ہوئے کہا کہ ریاست میں پھنسے ہوئے 60,000 سیاحوں کو نکال لیا گیا ہے۔
وزیراعلیٰ سکھو گزشتہ تین دنوں سے کلو میں مقیم ہیں۔ وہ یہاں جاری امدادی کارروائیوں کی نگرانی کر رہے ہیں۔ 9 اور 10 جولائی کو ریاست میں شدید بارشوں کے نتیجے میں آنے والے سیلاب کی وجہ سے زیادہ تر سڑکوں کو نقصان پہنچنے کے بعد ہزاروں سیاح یہاں پھنسے ہوئے تھے۔ اس کے علاوہ مقامی لوگوں کو لینڈ سلائیڈنگ کا سامنا کرنا پڑا۔
تاہم ریاست میں مسلسل بارش کی وجہ سے سیلاب سے متاثرہ علاقوں میں سڑکوں کی بحالی کا کام پانچ دن بعد بھی آگے نہیں بڑھ سکا۔ بارش اور سیلاب سے متعلق واقعات میں 88 افراد ہلاک اور 100 زخمی ہوچکے ہیں اور ہزاروں لوگ سیلاب سے متاثرہ علاقوں میں پھنسے ہوئے ہیں۔
