مہاراشٹر کے مراٹھواڑہ علاقے کے ہنگولی ضلع میں آج صبح 4.7 شدت کا زلزلہ آیا۔ زلزلے کے جھٹکے پڑوسی ناندیڑ اور پربھنی اضلاع میں محسوس کیے گئے۔ ہنگولی کے پانگرا شندے گاؤں میں کچھ مکانات اور کمیونٹی عمارتوں میں دراڑیں پڑ گئی ہیں حالانکہ اچھی بات یہ رہی کہ کوئی جانی نقصان نہیں ہوا ہے۔
نیشنل سینٹر فار سیسمولوجی کے مطابق زلزلے کے جھٹکے ہفتے کی صبح 8 بج کر 45 منٹ پر محسوس کئے گئے۔ زلزلے کا مرکز ہنگولی ضلع کے وسمت تعلقہ کے شیرلی گاؤں میں زمین سے 10 کلومیٹر نیچے تھا۔ ہنگولی کے ضلع مجسٹریٹ راہل گپتا نے بتایا کہ پانگرا شندے گاؤں میں مکانات اور کمیونٹی عمارتوں میں دراڑیں پڑنے کی تصاویر موصول ہوئی ہیں۔
انہوں نے کہا کہ ہماری ٹیمیں صورتحال کا جائزہ لینے کے لئے موقع پر پہنچ رہی ہیں۔ زلزلے کے جھٹکے ناندیڑ شہر، دیہی علاقوں، اردھا پور، ہدگاؤں، حمایت نگر تعلقہ اور پربھنی ضلع کے کچھ حصوں میں بھی محسوس کیے گئے۔ اس دوران کالج کے ایک استاد نے بتایا کہ مجھے اچانک جھٹکے لگے اور پھر احساس ہوا کہ یہ ایک ہلکا زلزلہ تھا۔ حکام نے بتایا کہ معمولی ساختی نقصان کی رپورٹ ملی ہے۔ مقامی حکام نے شہریوں سے پُرسکون رہنے اور حفاظتی پروٹوکول پر عمل کرنے کی اپیل کی ہے۔ وہیں ناندیڑ اور پربھنی میں ایمرجنسی رسپانس ٹیموں کو اسٹینڈ بائی پر رکھا گیا ہے۔
انتظامیہ نے ٹن شیٹ کی چھت والے گھروں سے بھاری پتھر ہٹانے کا مشورہ دیا ہے۔ اس کے ساتھ ہی کہا ہے کہ حفاظتی اقدامات کے طور پر چادروں کو بولٹ سے محفوظ کریں۔ ناندیڑ ضلع انتظامیہ نے رہائشیوں کو مشورہ دیا ہے کہ وہ مزید زلزلے کے جھٹکوں یا غیر معمولی آوازوں کی صورت میں فوری طور پر کھلی جگہوں پر چلے جائیں۔ انہیں ایمرجنسی ہیلپ لائن پر کال کرکے انتظامیہ کو مطلع کرنے کو بھی کہا گیا ہے۔
