بنگلور: کرناٹک میں سدارمیا حکومت نے جمعہ کو 2023-2024 کا بجٹ پیش کیا۔ اس بجٹ میں 3.27 لاکھ کروڑ روپے مختص کئے گئے ہیں۔ اس میں سے 52000 کروڑ روپے انتخابات سے قبل کانگریس کی طرف سے دی گئی پانچ ضمانتوں کو پورا کرنے کے لیے مختص کئے گئے ہیں۔ اس سے 1.3 کروڑ خاندانوں کو فائدہ پہنچنے کی امید ہے۔ انہوں نے بتایا کہ ان ضمانتوں کے ذریعے ہر گھر کو ہر ماہ 4000 سے 5000 روپے کی مالی امداد حاصل ہوگی۔
خیال رہے کہ کرناٹک اسمبلی انتخابات میں کانگریس نے زبردست جیت حاصل کی ہے۔ سیاسی تجزیہ کاروں کا خیال ہے کہ عوام نے کانگریس کی انتخابی ضمانتوں کو پسند کیا اور بہت زیادہ ووٹ دیا۔ یہی وجہ ہے کہ انتخابات میں کانگریس کو شاندار کامیابی ملی۔
کانگریس کو کرناٹک اسمبلی کی 224 میں سے 135 سیٹیں حاصل ہوئی ہیں۔ جبکہ بی جے پی صرف 66 سیٹوں تک محدود رہی۔ وہیں جے ڈی ایس کو اس الیکشن میں صرف 19 سیٹیں ملی ہیں۔ سدارمیا نے وزیر خزانہ کی حیثیت سے اسمبلی میں اپنا 14 واں بجٹ پیش کر کے سب سے زیادہ بجٹ پیش کرنے کا ریکارڈ قائم کر دیا ہے۔ ان سے پہلے سابق وزیر العیٰ رام کرشن ہیگڑے نے 13 بار بجٹ پیش کیا تھا۔
کانگریس کی 5 ضمانتیں کیا ہیں؟
1- ہر خاندان کو 200 یونٹ تک مفت بجلی دی جائے گی۔
2- گریجویٹ بے روزگاروں کے لیے 3 ہزار روپے ماہانہ الاؤنس اور ڈپلومہ ہولڈرز کے لیے 1.5 ہزار روپے ماہانہ الاؤنس فراہم کیا جائے گا۔
3- ہر خاندان کی ایک خاتون کو 2000 روپے ماہانہ الاؤنس دیا جائے گا۔
4- ہر غریب کو 10 کلو مفت اناج فراہم کیا جائے گا۔
5- ہر عورت کو سرکاری بسوں میں مفت سفر کی سہولت فراہم کی جائے گی۔
