نئی دہلی: دہلی اسمبلی انتخابات 2025 کے لیے ووٹنگ کا سلسلہ جاری ہے۔ صدر جمہوریہ دروپدی مرمو، لوک سبھا میں قائد حزب اختلاف راہل گاندھی، دہلی کی وزیر اعلیٰ آتشی، چیف جسٹس سنجیو کھنہ، انتخابی کمشنر سکھبیر سنگھ سندھو اور گیانی ش کمار سمیت کئی اہم شخصیات نے ووٹ ڈالے۔ صدر مرمو نے راشٹرپتی بھون کے احاطے میں قائم ڈاکٹر راجندر پرساد سینٹرل اسکول کے پولنگ بوتھ پر ووٹ ڈالا۔
قائد حزب اختلاف راہل گاندھی نے نرمان بھون پہنچ کر ووٹ ڈالا، جبکہ چیف جسٹس سنجیو کھنہ نے بھی اپنے ووٹ کا حق استعمال کیا جبکہ انتخابی کمشنر سکھبیر سندھو اور گیانی ش کمار نے اپنے اہلِ خانہ کے ہمراہ ووٹ ڈالا۔ وزیر اعلیٰ آتشی نے دہلی کے عوام سے ووٹنگ کی اپیل کرتے ہوئے کہا کہ "یہ محض ایک انتخاب نہیں بلکہ اچھائی اور برائی کے درمیان جنگ ہے۔
دہلی کے سابق نائب وزیر اعلیٰ اور ‘عام آدمی پارٹی’ کے امیدوار منیش سسودیا نے بھی ووٹ ڈالا اور بہتر تعلیم، صحت اور بنیادی سہولتوں کے لیے ووٹ دینے کی اپیل کی۔ وزیر خارجہ ایس. جے شنکر نے کہا کہ "عوام تبدیلی کے موڈ میں ہے۔”
بی جے پی کی رکنِ پارلیمان بانسری سواراج اور رہنما اروند سنگھ لولی نے بھی ووٹ ڈالا اور دہلی میں تبدیلی کی امید ظاہر کی۔ کانگریس رہنما راہل گاندھی کے علاوہ الکا لامبا نے بھی اپنا ووٹ ڈالا اور عوام سے مہنگائی اور بدعنوانی کے خلاف ووٹ دینے کی اپیل کی۔
دہلی کے مختلف حلقوں سے امیدواروں نے ووٹنگ کے دوران شفافیت پر زور دیا۔ عام آدمی پارٹی کے سوربھ بھاردواج نے ای وی ایم مشینوں کے اندھیرے میں رکھنے پر تحفظات کا اظہار کیا جبکہ بی جے پی کے امیدوار راج کمار آنند نے دہلی کی ترقی کے لیے ووٹ ڈالنے پر زور دیا۔دہلی انتخابات کے نتائج کے حوالے سے عوامی جوش و خروش عروج پر ہے اور مختلف جماعتوں کے امیدوار اپنی جیت کے لیے پُر امید ہیں۔
