احمد آباد : احمد آباد سے لندن جا رہا ایئر انڈیا کا طیارہ 12 جون کی دوپہر پرواز کے فوراً بعد ہی حادثہ کا شکار ہو گیا۔ اس طیارہ میں پائلٹ اور دیگر عملہ کے اہلکاروں سمیت 242 افراد سوار تھے۔ خبر رساں ایجنسی ایسو سی ایٹیڈ پریس نے اپنی ایک رپورٹ میں بتایا ہے کہ طیارہ میں سوار کوئی بھی زندہ نہیں بچا ہے۔ یعنی سبھی 242 لوگوں کی موت ہو چکی ہے۔ ایسو سی ایٹیڈ پریس نے یہ جانکاری پولیس کمشنر جی ایس ملک کے بیان کا حوالہ دیتے ہوئے دی ہے۔ خبر رساں ایجنسی کی رپورٹ کے مطابق پولیس کمشنر جی ایس ملک نے بتایا کہ ’’ایسا لگ رہا ہے کہ طیارہ حادثہ میں کوئی بھی زندہ نہیں بچا ہے۔ چونکہ طیارہ رہائشی علاقہ میں حادثہ کا شکار ہوا تھا، اس لیے کچھ مقامی لوگ بھی مارے گئے ہوں گے۔
اس حادثہ کے بعد وزیر اعظم نریندر مودی، مرکزی وزیر برائے شہری ہوابازی رام موہن نائیڈو، کانگریس پارلیمانی پارٹی کی چیئرپرسن سونیا گاندھی، لوک سبھا میں حزب اختلاف کے قائد راہل گاندھی سمیت مختلف پارٹیوں کے کئی سیاسی لیڈران نے تعزیتی پیغام میں متاثرہ کنبوں کے تئیں اپنی ہمدردی ظاہر کی ہے۔
نریندر مودی، وزیر اعظم
احمد آباد میں پیش آئے حادثہ نے ہمیں ششدر اور غمزدہ کر دیا ہے۔ یہ الفاظ سے پرے دل دہلا دینے والا حادثہ ہے۔ اس غمناک وقت میں میری ہمدردیاں اس سے متاثر سبھی لوگوں کے ساتھ ہیں۔ میں وزراء اور افسران کے رابطے میں ہوں۔ سبھی لوگ متاثرین کی مدد کے لیے کام کر رہے ہیں۔
رام موہن نائیڈو، مرکزی وزیر برائے شہری ہوابازی
احمد آباد طیارہ حادثہ کی خبر سے غمزدہ اور حیران ہوں۔ ہم الرٹ پر ہیں اور میں ذاتی طور پر حالات کا جائزہ لے رہا ہوں۔ سبھی ہوابازی ایمرجنسی ایجنسیوں کو ہدایت دی گئی ہے کہ وہ بہتر طریقے سے اور تیزی سے کارروائی کریں۔ بچاؤ ٹیموں کو بھی موقع پر بھیجا گیا اور طبی سہولیات کو بھی الرٹ کیا گیا ہے۔ میری ہمدردیاں اور دعائیں طیارہ میں سوار لوگوں اور ان کے اہل خانہ کے ساتھ ہیں۔
سونیا گاندھی، کانگریس پارلیمانی پارٹی چیئرپرسن
احمد آباد میں ہوئے دردناک طیارہ حادثہ سے میں بے حد حیران اور پریشان ہوں۔ میری ہمدردیاں مسافروں اور پائلٹ ٹیم کے اہل خانہ کے ساتھ ہیں۔ جو مناظر سامنے آئے ہیں، وہ بے حد تکلیف دہ ہیں۔ پورا ملک غم میں مبتلا ہے اور دعائیں کر رہا ہے۔
راہل گاندھی، لوک سبھا میں حزب اختلاف کے قائد
احمد آباد میں ایئر انڈیا کے طیارہ کا حادثہ دل دہلا دینے والا ہے۔ مسافروں اور عملہ کے اہلکاروں کے اہل خانہ جس تکلیف اور پریشانی کو محسوس کر رہے ہوں گے، وہ ناقابل تصور ہے۔ میری ہمدردی اور دعائیں اس ناقابل یقین حد تک مشکل لمحات میں متاثرین میں سے ہر ایک کے ساتھ ہیں۔ انتظامیہ کی طرف سے فوری بچاؤ اور راحت رسانی کی کوششیں اہم ہیں، کیونکہ ہر زندگی کی اہمیت ہے، ہر سیکنڈ اہمیت رکھتا ہے۔ کانگریس کارکنوں کو بھی زمینی سطح پر ہر ممکن مدد کرنی چاہیے۔
