ممبئی کے کُرلا مغربی ریلوے اسٹیشن کے قریب پیر کی رات ایک المناک حادثہ پیش آیا جب بیسٹ بس نے متعدد افراد اور گاڑیوں کو کچل دیا۔ اس افسوسناک واقعے میں7 افراد کی موت اور 42 افراد زخمی ہوئے۔ حادثے کے بعد پولیس نے ڈرائیور کے خلاف ایف آئی آر درج کر لی ہے، جبکہ زخمیوں کو مختلف اسپتالوں میں منتقل کیا گیا ہے۔
یہ واقعہ رات 9 بج کر 45 منٹ پر اس وقت پیش آیا جب بس ساکی ناکہ کی جانب جا رہی تھی۔ ابتدائی اطلاعات کے مطابق، ڈرائیور سنجے مورے کی تقرری حال ہی میں یکم دسمبر کو ہوئی تھی اور اسے بس چلانے کا تجربہ نہیں تھا۔ حادثے کے دوران ڈرائیور نے بس پر سے کنٹرول کھو دیا جس کے نتیجے میں یہ ہولناک سانحہ پیش آیا۔
بس میں موجود مسافروں کی تعداد تقریباً 60 بتائی گئی ہے، جبکہ حادثے میں 20 سے 25 گاڑیوں کو بھی نقصان پہنچا۔ زخمیوں میں 3 پولیس اہلکار اور ایک مہاراشٹر سکیورٹی فورس (ایم ایس ایف) کا اہلکار بھی شامل ہیں۔ پولیس سب انسپکٹر پرشانت چوہان کو بھی چوٹیں آئیں۔
حادثے کے فوراً بعد مقامی لوگوں نے زخمیوں کو قریبی اسپتال، بھابھا اسپتال، کوہینور اسپتال، سیون ہلز اسپتال اور حبیب اسپتال منتقل کیا۔ ریسکیو ٹیمیں اور پولیس فوری طور پر موقع پر پہنچ گئیں۔
اس حادثے کے بعد علاقے کے رکنِ اسمبلی مہیش کوڈالکر بھی جائے وقوعہ پر پہنچے اور واقعے پر شدید افسوس کا اظہار کیا۔ انہوں نے انتظامیہ سے ڈرائیور کے خلاف سخت کارروائی کا مطالبہ کیا چاور حادثے کے ذمہ داران کے خلاف کارروائی کی یقین دہانی کروائی۔
یہ حادثہ بیسٹ بس انتظامیہ کے حفاظتی اقدامات پر سوالات اٹھاتا ہے۔ ڈرائیور کی تقرری اور تربیت کے عمل کی بھی جانچ کی جا رہی ہے۔ زخمیوں کی حالت نازک بتائی جا رہی ہے اور ان کے علاج کے لیے تمام ممکنہ اقدامات کیے جا رہے ہیں۔
