روس اور یوکرین کے درمیان مہینوں سے جنگ جاری،روس کے تازہ حملے میں 5 ہلاک

چیرنیہائیو: روس اور یوکرین کے درمیان مہینوں سے جاری جنگ ختم ہونے کا نام نہیں لے رہی ہے۔ اب شمالی یوکرین کے شہر چیرنیہائیو میں ایک مرکزی چوراہے پر روسی میزائل حملے کی خبریں سامنے آ رہی ہیں۔ بتایا جا رہا ہے کہ اس حملے میں 5 لوگوں کی موت ہو گئی ہے، جبکہ 37 افراد زخمی ہوئے ہیں۔ اس سلسلے میں یوکرین کی وزارت داخلہ نے ہفتہ کے روز جانکاری دی۔ وزارت نے کہا کہ جب حملہ ہوا تب لوگ مذہبی تعطیل منانے کے لیے چرچ کی طرف جا رہے تھے۔
موصولہ اطلاعات کے مطابق میزائل حملے میں جو 37 افراد زخمی ہوئے ہیں ان میں 11 بچے بھی شامل ہیں۔ یوکرینی صدر زیلینسکی نے اس تعلق سے سوشل میڈیا ٹیلی گرام پر ایک پوسٹ شیئر کرتے ہوئے کہا کہ "ایک روسی میزائل شہر کے ٹھیک وسط میں ہمارے چیرنیہائیو میں گری۔ یہاں ایک چوراہا، پالی ٹیکنک یونیورسٹی اور ایک تھیٹر ہے۔صدر زیلنسکی کا روس کے تازہ حملے کے تعلق سے یہ بھی کہنا ہے کہ "ہفتہ کے ایک معمول والے دن کو روس نے درد اور نقصان والے دن میں بدل دیا۔” زیلنسکی کی پوسٹ کے ساتھ ایک چھوٹی سی ویڈیو بھی ہے جس میں مقامی ڈراما تھیٹر کے سامنے ایک چوراہا پر ملبہ بکھرا ہوا دکھایا گیا ہے اور وہاں پر کھڑی کاروں کو شدید نقصان پہنچا ہے۔ قابل ذکر یہ ہے کہ صدر ولودمیر زیلنسکی ان دنوں سویڈن کے دورہ پر ہیں۔