روہت شرما کے چہرے پر مسکراہٹ لوٹ آئی

نئی دہلی: ہندوستان کرکٹ ٹیم کے کپتان روہت شرما کے چہرے پر مسکراہٹ لوٹ آئی ہے۔ آئی سی سی کرکٹ ورلڈ کپ کے فائنل میں آسٹریلیا کے ہاتھوں شکست کا سامنا کرنے کے بعد روہت بہت افسردہ ہوگئے تھے۔ انہوں نے ورلڈ کپ فائنل کے بعد خود کو سوشل میڈیا سے دور کر لیا تھا۔ وہ نہ تو کچھ ٹوئٹ کر رہے تھے اور نہ ہی اپنی تصاویر یا ویڈیوز شیئر کر رہے تھے۔ خیال کیا جا رہا تھا کہ فائنل میں شکست کے بعد روہت کو گہرا صدمہ پہنچا ہے جس سے صحت یاب ہونے میں انہیں کافی وقت لگ سکتا ہے۔ لیکن ‘ہٹ مین کے مداحوں کو اب پریشان ہونے کی کوئی ضرورت نہیں ہے۔
روہت شرما کی اہلیہ ریتیکا سجیدیہہ نے سوشل میڈیا پر اپنی انسٹاگرام اسٹوری میں اپنے شوہر روہت شرما کے ساتھ اپنی ایک سیلفی اپ لوڈ کی جس میں یہ جوڑا بہت خوش نظر آرہا ہے۔ روہت کے چہرے پر بھی مسکراہٹ ہے۔ یہ تصویر فلائٹ کے اندر کی معلوم ہوتی ہے۔ ریتیکا سجیدیہہ نے تصویر پر سرخ رنگ کا ہارٹ ایموجی پوسٹ کیا اور لکھا، ‘مائی بوائے۔ اس سے قبل کچھ دن پہلے روہت نے ایک تصویر شیئر کی تھی جس میں وہ اپنی اہلیہ ریتیکا کے ساتھ خالی سڑک پر چلتے ہوئے نظر آئے تھے۔ حالانکہ اس تصویر میں ان دونوں کے چہرے نظر نہیں آ رہے تھے۔