نئی دہلی: کانگریس جنرل سکریٹری جے رام رمیش نے جمعہ (9 جون) کو ملک میں دودھ کی پیداوار میں کمی کو لے کر مودی حکومت کو نشانہ بنایا۔ انہوں نے ٹوئٹ کیا کہ ہندوستان دودھ کے بحران کے دہانے پر ہے اور مودی حکومت اپنے انتخابی فوائد کے لیے ایک کوآپریٹو کو دوسرے کے خلاف کھڑا کر رہی ہے۔
جے رام رمیش نے ٹوئٹر پر ایک میڈیا رپورٹ کا حوالہ دیتے ہوئے دعویٰ کیا کہ سفید انقلاب کے 50 سال بعد دنیا کا سب سے بڑا دودھ پیدا کرنے والا ملک ہندوستان اب دودھ کی قلت کا سامنا کر رہا ہے اور متعلقہ مصنوعات درآمد کرنے پر مجبور ہو رہا ہے۔
جے رام رمیش نے ٹوئٹ کیا ’’ہندوستان دودھ کے بحران کے دہانے پر ہے جس کے نتیجے میں مہنگائی میں اضافہ ہو رہا ہے اور ڈیری کاشتکاروں کو مزید تکلیف پہنچ رہی ہے، جو پہلے ہی چارے کی بڑھتی ہوئی قیمتوں کے باعث جدوجہد کر رہے ہیں۔ اس بحران کے نتیجے میں جو کورونا وبائی بیماری کے بعد سے جاری ہے، دنیا کا سب سے بڑا دودھ پیدا کرنے والا ملک اب دوسرے ممالک سے دودھ اور دودھ کی مصنوعات درآمد کرنے پر مجبور ہے۔‘‘
انہوں نے کہا کہ اس بحران میں مودی حکومت کیا کر رہی ہے؟ اپنے انتخابی نتائج کو فائدہ پہنچانے کی کوشش میں ایک کوآپریٹو کو دوسرے کے خلاف کھڑا کر رہی ہے۔
