اسپیڈیکس مشن کے تحت 2 سیٹیلائٹوں کی کامیاب ڈاکنگ

ہندوستانی خلائی تحقیقی تنظیم (اسرو) نے جمعرات کو ایک بار پھر سے تاریخ رقم کر دی ہے۔ اسرو نے اسپیڈیکس (اسپیس ڈاکنگ ایکسرسائز) مشن کے تحت دو سیٹیلائٹ کو کامیابی کے ساتھ ڈاک کرنے کا عمل پورا کر لیا۔ اس کے ساتھ ہی ہندوستان امریکہ، روس اور چین کے بعد یہ کارنامہ انجام دینے والا چوتھا ملک بن گیا ہے۔ اسرو کی اس کامیابی پر پورے ملک میں خوشی کی لہر ہے اور سیاسی و سماجی رہنماؤں سمیت مختلف شعبہ ہائے زندگی سے تعلق رکھنے والی اہم شخصیات نے مبارک باد دی ہے۔
‘اسرو’ نے اس سلسلے میں سوشل میڈیا پر ایک پوسٹ کرتے ہوئے اسے تاریخی لمحہ بتایا۔ اسرو نے ‘ایکس’ پر لکھا “ہندوستان نے خلائی تاریخ میں اپنا نام درج کر لیا ہے۔ سو پربھات بھارت، اسرو کے اسیپڈیکس مشن نے ‘ڈاکنگ’ میں تاریخی کامیابی حاصل کی ہے۔ اس لمحہ کا گواہ بن کر فخر محسوس ہو رہا ہے۔”
اسرو کی اس کامیابی پر وزیر اعظم نریندر مودی نے مبارک باد پیش کی ہے۔ انہوں نے سوشل میڈیا پر کیے گئے اپنے ایک پوسٹ میں لکھا، “سیٹیلائٹس کی خلائی ڈاکنگ کے کامیاب مظاہرہ کے لیے اسرو کے ہمارے سائنس دانوں اور مکمل خلائی برادری کو مبارک باد۔ یہ آنے والے برسوں میں ہندوستان کے اہم اور کثیرالمقاصد خلائی مہمات کے لیے ایک بڑا قدم ہے۔
مشن کے تحت پہلے دونوں سیٹیلائٹ کو 20 کلومیٹر کی دوری پر رکھا گیا۔ اس کے بعد چیسر سیٹیلائٹ نے ٹارگیٹ سیٹیلائٹ کے پاس جاکر 5 کلومیٹر، 1٫5 کلومیٹر، 500 میٹر اور 225 میٹر، 15 میٹر اور آخر میں 3 میٹر تک کی دوری طے کی۔ اس کے بعد دونوں سیٹیلائٹ کو ایک ساتھ جوڑا گیا۔ ڈٓاکنگ کے بعد سیٹیلائٹس کے درمیان بجلی کی منتقلی کا مظاہرہ کیا گیا، پھر دونوں کو الگ کرکے ان کے متعلق پیلوڈ آپریشن شروع کیا گیا۔
واضح ہو کہ اس سے پہلے اسرو نے دو مرتبہ ڈاکنگ کی کوشش کی تھی لیکن تکنیکی مسائل کی وجہ سے 7 اور 9 جنوری کو یہ ممکن نہیں ہو سکا تھا۔ 12 جنوری کو اسرو نے سیٹیلائٹ کو 15 میٹر اور 3 میٹر کی دوری تک لانے میں کامیابی حاصل کی تھی۔ اسرو نے کہا تھا، “15 میٹر اور 3 میٹر تک کی دوری کو کامیابی سے طے کیا گیا ہے۔ اس کے بعد سیٹیلائٹ کو محفوظ دوری پر لے جایا گیا۔ ڈاٹا کا تجزیہ کرنے کے بعد ڈاکنگ عمل پورا کیا جائے گا۔