سیما حیدر نے اپنے وکیل اے پی سنگھ کوبھائی بناکر راکھی باندھی

نوئیڈا: پاکستان سے سرحد عبور کرکے ہندوستان آنے والی سیما حیدر اب رکھشا بندھن کے تہوار کو لے کر کافی پرجوش ہے۔ منگل کو اس نے اپنے وکیل اے پی سنگھ کو راکھی باندھی۔ اس موقع پر اے پی سنگھ نے کہا کہ اب سے سیما کے تمام دکھ اور میری تمام خوشیاں اس کے لیے وقف ہیں۔ میری بہن کا گھر ہرا بھرے رہے اور بچے خوش رہیں، یہ میری خواہش ہے۔ اگر سیما کو ملک کی روایات، رسم و رواج اور ثقافت کے اندر کسی بھی قسم کی پریشانی کا سامنا کرنا پڑتا ہے تو میں ہمیشہ اس کے ساتھ کھڑا رہوں گا۔
سیما نے پاکستانی شہریوں سے بھی راکھی کا تہوار منانے کی اپیل کی ہے۔ سیما نے کہا کہ میں نے زندگی میں پہلی بار راکھی باندھی ہے۔ میں نے وکیل اے پی سنگھ کو راکھی بھیجی تھی، لیکن وہ بندھوانے میرے گھر آئے، میں اس سے زیادہ خوش ہوں۔ سیما نے کچھ دن پہلے پی ایم نریندر مودی، وزیر داخلہ امت شاہ، یوپی کے وزیر اعلی یوگی آدتیہ ناتھ کو بھی راکھی پوسٹ کی تھی۔
سیما کو راکھی باندھنے کے بعد ایڈوکیٹ اے پی سنگھ نے کہا کہ یہ کچا دھاگہ یاد دلاتا رہے گا کہ بہن کے سارے دکھ میرے ہیں۔ سیما نے کہا کہ مجھے خوشی ہے کہ مجھے اے پی سنگھ جیسا بھائی ملا ہے۔ اس لیے میں آج اپنے بھائی کو راکھی باندھتے ہوئے بہت خوش ہوں۔ راکھی باندھنے کے بعد اے پی سنگھ نے سیما حیدر کو تحفہ بھی دیا۔سیما نے کہا کہ بھائی بہن کا ایسا تہوار پاکستان میں نہیں منایا جاتا۔