نئی دہلی:گرمی کی شدت میں رفتہ رفتہ اضافہ ہو رہا ہے لیکن کچھ جگہوں پر بارش کے امکان بھی ہیں۔ محکمہ موسمیات نے دہلی، مدھیہ پردیش، اتر پردیش، راجستھان، اترا کھنڈ اور چھتیس گڑھ کے لیے الگ الگ پیشن گوئی جاری کی ہے۔ دہلی میں زیادہ سے زیادہ درجہ حرارت میں اضافہ ہونے کی امید ہے۔ وہیں مدھیہ پردیش میں بارش کا امکان ہے۔ ساتھ ہی جنوبی ہند کے کئی علاقوں میں بھی بارش ہونے کے اچھے آثار ہیں، جس سے وہاں کے لوگوں کو گرمی سے راحت مل سکتی ہے۔ پہاڑی علاقوں میں موسم سہانا بنا رہے گا، اس سے سیاحوں کو گھومنے کا اچھا موقع ملے گا۔
اتر پردیش میں گرمی بڑھ رہی ہے جبکہ راجستھان کے درجہ حرارت میں تیزی سے اضافہ ہو رہا ہے۔ اترا کھنڈ میں گرمی کا قہر جاری ہے تو چھتیس گڑھ میں بارش کا امکان ہے۔ ملک کی کئی ریاستوں میں اپریل سے جون تک شدید گرمی ہوگی۔ مدھیہ پردیش میں کئی مقامات پر بادل چھائے رہنے کے ساتھ ہی ہلکی بارش ہونے کا امکان ظاہر کیا گیا ہے۔ محکمہ موسمیات کو اتر پردیش اور اترا کھنڈ میں گرمی جاری رہنے کی امید ہے۔
اترا کھنڈ کے پہاڑی علاقوں میں بھی گرمی پریشان کرنے والی ہے۔ زیادہ تر علاقوں میں ابھی درجہ حرارت میں اضافہ ہوگا۔ وہیں ریاست کے میدانی علاقوں میں درجہ حرارت 37 ڈگری سیلسیس تک پہنچ سکتا ہے۔ تلنگانہ اور کرناٹک کے کئی علاقوں میں تیز ہوائیں چلنے کے ساتھ ہی بھاری بارش کا امکان محکمہ موسمیات کی طرف سے ظاہر کیا گیا ہے۔
ملک کی راجدھانی دہلی میں آج (3 اپریل) کم سے کم درجہ حرارت 19 ڈگری سیلسیس اور زیادہ سے زیادہ 38 ڈگری سیلسیس رہ سکتا ہے۔ محکمہ موسمیات کے مطابق آج دہلی کے آسمان میں جزوی طور سے بادل چھائے رہیں گے۔ ویسے محکمہ موسمیات نے اس سلسلے میں موسم سے جڑی کسی بھی طرح کی وارننگ جاری نہیں کی ہے۔
اگلے 24 گھنٹے میں تلنگانہ، مدھیہ پردیش، گوا، کیرالہ، چھتیس گڑھ، مہاراشٹر، آندھرا پردیش اور اوڈیشہ میں 40 سے 60 کلومیٹر فی گھنٹہ کی رفتار سے ہوائیں چلیں گی۔ کئی ریاستوں میں آندھی اور بجلی گرنے کی پیشن گوئی کی گئی ہے۔
