نئی دہلی: لوک سبھا میں قائد حزب اختلاف راہل گاندھی نے وزیر اعظم نریندر مودی کی ناروے یاترا کے دوران پیش آئے ایک واقعے کو لے کر ان پر سخت تنقید کی ہے۔ سوشل میڈیا پر وائرل ایک ویڈیو میں ایک ناروے کی خاتون صحافی وزیر اعظم مودی سے سوال کرتی نظر آ رہی ہیں، جبکہ وزیر اعظم وہاں سے آگے بڑھ جاتے ہیں۔ اس ویڈیو کو راہل گاندھی نے اپنی ایکس پوسٹ پر شیئر کرتے ہوئے کہا کہ جب چھپانے کے لیے کچھ نہ ہو تو ڈرنے کی بھی ضرورت نہیں ہوتی۔
راہل گاندھی نے اپنی پوسٹ میں لکھا کہ دنیا جب ایک ’کمپرومائزڈ پی ایم‘ کو چند سوالوں سے گھبرا کر جاتے ہوئے دیکھتی ہے تو اس سے ہندوستان کی عالمی شبیہ پر اثر پڑتا ہے۔ ان کے اس بیان کے بعد سیاسی حلقوں میں بحث تیز ہو گئی ہے اور سوشل میڈیا پر بھی اس معاملے پر مختلف ردعمل سامنے آ رہے ہیں۔
وائرل ویڈیو میں ناروے کی صحافی ہیلے لِنگ وزیر اعظم مودی سے سوال کرتی سنائی دیتی ہیں کہ وہ دنیا کی سب سے آزاد پریس کے سوالات کا سامنا کیوں نہیں کرتے۔ تاہم ویڈیو میں وزیر اعظم کوئی جواب دئے بغیر آگے بڑھتے ہوئے دکھائی دیتے ہیں۔ بعد میں ہیلے لِنگ نے بھی اپنے سوشل میڈیا اکاؤنٹ پر ویڈیو شیئر کرتے ہوئے لکھا کہ انہیں اس بات کی توقع نہیں تھی کہ وہ (وزیر اعظم مودی) ان کے سوال کا جواب نہیں دیں گے۔ انہوں نے یہ بھی کہا کہ ورلڈ پریس فریڈم انڈیکس میں ناروے پہلے مقام پر ہے جبکہ ہندوستان 157 ویں نمبر پر ہے۔
اس معاملے پر کانگریس کے آفیشل ایکس ہینڈل سے بھی وزیر اعظم کو نشانہ بنایا گیا۔ پارٹی کی جانب سے ایکس پر جاری بیان میں کہا گیا کہ ناروے جیسے ملک میں صحافی اہم مسائل پر سوال کرتے ہیں اور حکومت سے جواب دہی طے کرتے ہیں۔ کانگریس نے ہندوستانی میڈیا کے ایک طبقے کو بھی تنقید کا نشانہ بناتے ہوئے کہا کہ یہاں اصل مسائل کے بجائے غیر سنجیدہ سوالات پر زور دیا جاتا ہے۔
خیال رہے کہ وزیر اعظم نریندر مودی اس وقت پانچ ممالک کے سرکاری دورے پر ہیں۔ وہ متحدہ عرب امارات، نیدرلینڈس اور سویڈن کے بعد ناروے پہنچے ہیں۔ ان کے اس دورے کو سفارتی اعتبار سے اہم قرار دیا جا رہا ہے، تاہم ناروے میں سامنے آئے اس ویڈیو نے سیاسی ماحول کو مزید گرم کر دیا ہے۔
