دربھنگہ کے شوبھن میں ایمس بنانے کا راستہ ہموار

پٹنہ :باوثوق ذرائع سے موصول اطلاع کے مطابق دربھنگہ ایمس کی تعمیر کا منصوبہ ایک قدم آگے بڑھ گیا ہے کیونکہ ریاستی حکومت نے 7 دسمبر کو دربھنگہ کے شوبھن میں ایمس کی تعمیر سے متعلق تجویز مرکزی حکومت کو سونپ دی۔بتایا جا رہا ہے کہ محکمہ صحت کے ایڈیشنل چیف سکریٹری پرتیہ امرت نے نئی دہلی میں مرکزی وزارت برائے صحت و خاندانی فلاح کے سکریٹری سدھانش پنت کو دربھنگہ ایمس سے متعلق تجویز سونپ دی ہے۔ محکمہ جاتی اطلاع کے مطابق ریاستی حکومت نے نئی تجویز میں مرکزی حکومت کی سبھی ضروری شرائط کو منظور کر لیا ہے۔ اس میں دربھنگہ ایمس کو 4 لین سے جوڑنے کا کام بھی شامل ہے۔
میڈیا رپورٹس کے مطابق دربھنگہ ایمس کی تعمیر کے لیے زمین کو برابر کر بجلی اور پانی کی فراہمی بحال کرنے کی ذمہ داری ریاستی حکومت کو ملی ہے۔ علاوہ ازیں مرکزی حکومت سے گزارش کی گئی ہے کہ وہ دربھنگہ میں نئے ڈیزائن پر ایمس کی تعمیر کرائے تاکہ مقامی ضروریات پوری ہو سکیں۔ شوبھن میں منظور کی گئی زمین ایمس-دربھنگہ 4 لین سے پانچ کلومیٹر دور ہے، ایسے میں یہاں مریض بغیر جام میں پھنسے آسانی سے پہنچ سکتے ہیں۔ ریاستی حکومت نے بہار ہیلتھ اینڈ بیسک انفراسٹرکچر کارپوریشن لمیٹڈ کو زمین کی بھرائی اور چہار دیواری تعمیر کی ذمہ داری سونپی ہے۔