مرکزی وزیر اور لوک جن شکتی پارٹی (رام ولاس) کے قومی صدر چراغ پاسوان نے بہار کو ایک ترقی یافتہ ریاست بنانے کے عزم کے ساتھ کل کہا کہ ان کی پارٹی ریاست کی تمام 243 سیٹوں پر الیکشن لڑنے کے لیے تیار ہے اتوار کو ویر کنور سنگھ اسٹیڈیم میں نو سنکلپ مہاسبھا سے خطاب کرتے ہوئے چراغ پاسوان نے کہا کہ ان کا عزم بہار کو ملک کی نمبر ایک ریاست بنانا ہے۔ انہوں نے کہا کہ میں اس وقت تک آرام سے نہیں بیٹھوں گا جب تک میں بہار کو ترقی یافتہ ریاست نہیں بنادیتا۔ آپ سب کو فیصلہ کرنا ہے کہ میں کہاں سے اسمبلی الیکشن لڑوں۔
وزیر نے کہا، ”ہاں، میں اسمبلی الیکشن لڑوں گا اور بہار کی تمام 243 سیٹوں پر لڑوں گا۔ مجھے میرے اپنوں نے ہی گھر اور پارٹی سے باہرکیا لیکن بہار کے تمام لوگ میرا کنبہ ہیں۔ میں اپنے لوگوں کی خاطر الیکشن لڑوں گا۔ میرا ایک ہی مقصد ہے ترقی یافتہ بہار، ’بہار فرسٹ، بہاری فرسٹ‘۔“
چراغ پاسوان نے کہا کہ یہ سال سب کے لیے خاص طور پر بہار کے لوگوں کے لیے اہم ہے۔ یہ سال اگلے پانچ سالوں کے لیے بہار کا مستقبل طے کرے گا۔ یہ پانچ سال بہار سے تعلق رکھنے والے شخص کی زندگی میں اہم ہیں۔ انہوں نے عوام سے اپیل کرتے ہوئے کہا کہ جب لیڈر آپ کے درمیان آئیں تو آپ ضرور پوچھیں کہ ان لوگوں نے اتنے سالوں میں کیا کیا – آج کل ایک مرکزی رہنما جب دہلی جاتے ہیں تو ہمارے بہار کو جرائم کی راجدھانی کہتے ہیں، بس اس لیڈر سے پوچھیں کہ کیا وہ انتخابات کے بعد بھی بہار آئیں گے؟
