یوم جمہوریہ کے موقع پرکسانوں نے ٹریکٹر ریلی نکالی

نئی دہلی: سنیوکت کسان مورچہ (ایس کے ایم) نے 26 جنوری یعنی یوم جمہوریہ کے موقع پر ملک کے کئی حصوں میں ٹریکٹر پریڈ نکالی۔ رپورٹ کے مطابق سنیوکت کسان مورچہ کی قومی کمیٹی کی اپیل پر ملک بھر کی متعدد ریاستوں میں 500 سے زیادہ اضلاع میں کسان ٹریکٹر ترنگا پریڈ نکالی گئی۔رپورٹ کے مطابق کسانوں نے مختلف شہروں میں ٹریکٹر پر ترنگا ریلی نکالی اور حکومت مخالف نعرے لگائے۔ آئندہ 16 فروری کو صنعتی اور دیہاتی بھارت بند کی کال دی گئی ہے۔ پریڈ میں شامل کسانوں کا کہنا تھا کہ ٹریکٹر پریڈ کانوں اور مزدوروں کے مسائل اور طویل مدتی مطالبات کی جانب حکومت کی توجہ مبذول کرانے اور عوامی حمایت اور اتحاد کو ظاہر کرنے کے لیے نکالی گئی ہے۔
ایس کے ایم نے ایک بیان میں کہا، ’’کسان یونینوں اور تنظیموں کے علاوہ ٹریڈ یونینوں نے بھی اس ٹریکٹر پریڈ میں حصہ لیا اور جمہوریہ ہند کے سیکولر اور جمہوری کردار کو مضبوط کرنے کا حلف لیا۔ مرکزی حکومت نے جن مطالبات کو پورا کرنے کا یقین دلایا ہے، انہیں پورا کیا جانا چاہیے۔ ایس کے ایم نے 16 فروری 2024 کو گرامین (دیہات) بھارت بند کی کال بھی دی ہے۔