میدانی علاقوں میں چلنے والی سرد اور خشک ہواؤں کی وجہ سے شمالی ہندوستان کے بڑے حصے میں سردی کی نئی لہر کی پیش گوئی کی گئی ہے۔ ہندوستان کے محکمہ موسمیات (آئی ایم ڈی) کے مطابق 15 سے 35 کلومیٹر فی گھنٹہ کی رفتار کے ساتھ شمال مغربی ہوائیں چلنے کا بھی امکان ہے جس کی وجہ سے کئی شمالی ریاستوں میں رات کے درجہ حرارت میں تیزی سے گراوٹ آئے گی۔
آئی ایم ڈی کی پیشن گوئی کا حوالہ دیتے ہوئے ایک آزاد مبصرموسمیات کی جانب سے سوشل میڈیا پرشیئر کی گئی موسم کی تازہ رپورٹ کے مطابق 24 اور 26 جنوری کے درمیان پنجاب، ہریانہ، چندی گڑھ، دہلی-این سی آر اور شمال مغربی راجستھان کے بیشتر شہروں میں کم سے کم درجہ حرارت 0 سے 5 ڈگری سیلسیس تک کم ہونے کی توقع ہے۔
انہوں نے بتایا کہ دن میں دھوپ نکلنے کے باوجود اس عرصے کے دوران زیادہ سے زیادہ درجہ حرارت 13 سے 17 ڈگری سیلسیس کے درمیان رہنے کی توقع ہے۔ دریں اثنا آئی ایم ڈی کی جانب سے کہا گیا ہے کہ 24 اور 25 جنوری کو مغربی ہمالیائی خطے میں برف باری کی سرگرمیاں کم ہو کر بکھری ہوئی یا ہلکی بارش میں تبدیل ہونے کا امکان ہے۔
دوسری طرف محکمہ موسمیات کے مطابق 27 جنوری سے شمال مغربی ہندوستان میں بارش کا ایک نیا دور شروع ہونے کا امکان ہے جس سے 27 جنوری کو مغربی ہمالیائی علاقے میں شدید بارش اور برف باری ہوگی۔ 28 جنوری کو ہلکی بارش ہوسکتی ہے۔ اسی دوران محکمہ موسمیات نے کہا ہے کہ جموں و کشمیر اور ہماچل پردیش میں 27 جنوری کو الگ الگ مقامات پر شدید بارش اور برفباری کا امکان ہے، جبکہ اسی دوران شمال مغربی میدانی علاقوں میں ہلکی سے درمیانی بارش ہوسکتی ہے۔
