منی پور تشدد کودو سال مکمل

اسی کیمپ کی ایک اور خاتون، 60 سالہ ہیکھول کہتی ہیں، ’’اگر واپس جانا ممکن نہیں تو ہمیں مستقل بستی ہی دے دی جائے، جہاں کم از کم ذاتی مکان میں سانس تو لے سکیں۔‘‘انتظامیہ کے مطابق پچھلے تین ماہ میں چند مثبت اقدامات ضرور ہوئے ہیں، جیسے کچھ افراد کی جزوی طور پر پرانی بستیوں میں واپسی۔ ایک افسر نے بتایا، ’’چند سرحدی علاقوں میں واپسی کے امکانات کا جائزہ لیا جا رہا ہے، جہاں سیکورٹی فراہم کی جا سکے۔ کچھ میتئی خاندانوں کو خاموشی سے ان کے پرانے گھروں میں بسایا گیا ہے لیکن ان کی سلامتی کی خاطر ان کی واپسی کو عام نہیں کیا گیا۔‘‘

ریاست میں جاری گروہی کشیدگی اب واضح طور پر مستقل تقسیم کی شکل اختیار کرتی جا رہی ہے۔ کوکی-زومی گروہ جہاں الگ ریاست یا مرکز کے زیرانتظام علاقہ (یونین ٹیریٹری) کا مطالبہ کر رہے ہیں، وہیں میتئی گروپ ریاست کے اتحاد کی وکالت کرتے نظر آتے ہیں۔مرکزی حکومت کی طرف سے شمال مشرقی امور کے مشیر اے کے مشرا کی سربراہی میں حال ہی میں دہلی میں دونوں کمیونٹی کے سماجی نمائندوں کی ملاقات ضرور ہوئی، مگر کوئی ٹھوس نتیجہ نہیں نکل سکا۔ ایک سکیورٹی افسر کے مطابق، ’’ظاہری سکون کے باوجود صورتحال اندر سے اب بھی نازک اور غیر مستحکم ہے۔ اصل حل صرف جامع سیاسی مکالمے سے ہی نکلے گا۔‘‘دو سال مکمل ہونے کے باوجود منی پور میں نسلی اور سماجی تقسیم جوں کی توں برقرار ہے۔ ریلیف کیمپوں میں بسنے والے ہزاروں افراد کے لیے ہر دن بے گھر ہونے کا ایک اور کٹھن باب ہے، جب کہ ریاست میں پائیدار امن کا خواب اب بھی ادھورا ہے۔