ترنمول کانگریس کی بے باک رکن پارلیمنٹ مہوا موئترا نے خاموشی کے ساتھ شادی کر لی، اور کسی کو کانوں کان خبر بھی نہیں ہوئی۔ انھوں نے بی جے ڈی لیڈر پناکی مشرا سے شادی کی ہے۔ میڈیا رپورٹس کے مطابق سیاست کی دنیا کی دونوں مقبول ہستیوں نے جرمنی میں سات پھیرے لیے۔ ساتھ ہی یہ بھی دعویٰ کیا گیا ہے کہ 2 مرتبہ کی لوک سبھا رکن مہوا موئترا نے گزشتہ 3 مئی کو ہی شادی کر لی تھی۔ یعنی شادی کے ایک ماہ بعد میڈیا کو خبر لگی۔
دلچسپ بات یہ ہے کہ ابھی تک نہ ہی مہوا موئترا کی طرف سے، اور نہ ہی پناکی مشرا کی طرف سے اس شادی کی تصدیق ہوئی ہے۔ ایک تصویر ضرور سامنے آئی ہے جس میں مہوا زیورات سے لدی ہوئی دکھائی دے رہی ہیں۔ وہ مانگ ٹیکا پہنے ہوئی ہیں اور پناکی کا ہاتھ پکڑے ہوئی مسکراتی ہوئی نظر آ رہی ہیں۔ اس شادی سے متعلق رپورٹ ’دی ٹیلی گراف‘ میں شائع ہوئی، اور پھر دیگر میڈیا اداروں نے بھی اسے ترجیحات کے ساتھ شائع کیا۔ ترنمول کانگریس کی طرف سے بھی اس شادی کے بارے میں کوئی آفیشیل بیان سامنے نہیں آیا ہے۔
50 سالہ مہوا موئترا کی یہ دوسری شادی ہے۔ اس سے قبل انھوں نے ڈینش فائنانسر لارس برورسر سے شادی کی تھی، جن سے انھوں نے طلاق لے لیا۔ مہوا ترنمول کانگریس کے ٹکٹ پر دوسری مرتبہ لوک سبھا پہنچی ہیں۔ وہ مغربی بنگال کی کرشنا نگر سیٹ کی نمائندگی کرتی ہیں۔ رکن پارلیمنٹ بننے سے قبل مہوا رکن اسمبلی تھیں۔ انھوں نے 2016 سے 2019 تک کریم پور کی نمائندگی کرتے ہوئے مغربی بنگال اسمبلی رکن کی شکل میں کام کیا۔
