بہار اسمبلی انتخاب سے عین قبل جنتا دل یو کو اس وقت شدید جھٹکا لگا جب جنتا دل یو کے ایک سابق رکن پارلیمنٹ اور سابق رکن اسمبلی سمیت کئی دیگر لیڈران پارٹی چھوڑ کر آر جے ڈی میں شامل ہو گئے۔ دلچسپ بات یہ ہے کہ آر جے ڈی میں شمولیت اختیار کرنے والوں میں لوک جن شکتی پارٹی کے بھی کچھ لوگ نظر آئے۔
جنتا دل یو کے سابق رکن پارلیمنٹ سنتوش کشواہا، جنتا دل یو کے سابق رکن اسمبلی راہل شرما اور دیگر لیڈران نے آج تیجسوی یادو کی موجودگی میں آر جے ڈی کا دامن تھاما۔ لوک جن شکتی پارٹی لیڈر اجئے کشواہا اور جنتا دل یو کے بانکا سے رکن پارلیمنٹ گردھاری پرساد یادو کے بیٹے چانکیہ پرساد رنجن بھی آر جے ڈی میں شامل ہوئے۔
قابل ذکر ہے کہ سنتوش کشواہا نے لگاتار 2 مرتبہ پورنیہ لوک سبھا سیٹ سے جنتا دل یو کے ٹکٹ پر کامیابی حاصل کی تھی، لیکن 2024 میں ہوئے لوک سبھا انتخاب میں وہ پپو یادو سے ہار گئے تھے۔ سنتوش کشواہا کی انٹری 2014 لوک سبھا انتخاب میں بہت حیرت انگیز تھی، جب انھوں نے بی جے پی چھوڑ کر بیسی اسمبلی سیٹ سے استعفیٰ دیا تھا اور مودی لہر کے خلاف انتخاب لڑتے ہوئے وزیر اعلیٰ نتیش کمار کی پارٹی کے لیے محض 2 میں سے ایک سیٹ جیتی تھی۔ نتیش کمار اس شکست سے ٹوٹ گئے تھے اور اخلاقی ذمہ داری قبول کرتے ہوئے عہدہ چھوڑ دیا تھا، لیکن ایک سال سے بھی کم وقت بعد ہی وہ دوبارہ عہدے پر فائز ہو گئے۔
