ایودھیا کے رام مندر میں عطیات چوری کے معاملے میں تفتیش کے دوران حیران کن انکشافات سامنے آئے ہیں۔ پولیس پوچھ گچھ میں یہ بات سامنے آئی ہے کہ 40 دنوں کے اندر مبینہ طور پر 70 بار عطیات سے رقم نکالی گئی۔ تفتیش کے بعد اب مندر انتظامیہ نے عطیات کی گنتی کا نظام بھی تبدیل کر دیا ہے۔ پہلے 2 شفٹوں میں ہونے والی گنتی اب صرف ایک ہی شفٹ میں کی جائے گی۔ پولیس کی پوچھ گچھ سے ملی معلومات کی بنیاد پر پتہ چلا ہے کہ مبینہ چوری کے واقعات صرف شام کی شفٹ کے دوران ہوئے تھے۔ اسی وجہ سے اب مندر انتظامیہ نے چڑھاوے کی گنتی کا پورا طریقۂ کار تبدیل کر دیا ہے۔
ہندی نیوز پورٹل ’آج تک‘ پر پولیس ذرائع کے حوالے سے شائع خبر کے مطابق پوچھ گچھ کے دوران ملزمان اویناش شکلا، انوکلپ مشرا، لوکش مشرا اور کرونیش پانڈے سے کئی اہم معلومات ملی ہیں۔ تفتیش میں یہ بات سامنے آئی ہے کہ تقریباً 40 دنوں کے اندر 70 بار عطیات سے مبینہ طور پر رقم نکالی گئی۔ پولیس کے مطابق اس پورے معاملے میں سب سے اہم کردار اویناش شکلا کا سامنے آیا ہے۔ پوچھ گچھ میں ملنے والی معلومات کے مطابق اس نے اکیلے 50 سے زیادہ بار عطیات سے چوری کی۔ اتنا ہی نہیں کئی دنوں میں ملزمان نے ایک ہی دن میں 2-2 بار چڑھاوے سے رقم نکالنے کی کوشش کی۔
تفتیش میں یہ بھی سامنے آیا کہ 40 دنوں کے دوران 5 ایسے دن بھی تھے، جب مبینہ طور پر ایک ہی دن میں 3-3 بار چوری کی گئی۔ تفتیش کے دوران یہ بھی معلوم ہوا کہ پہلی شفٹ میں گنتی کے دوران ایسا کوئی واقعہ سامنے نہیں آیا۔ تفتیشی ایجنسیوں کا کہنا ہے کہ پوچھ گچھ میں یہ بات بھی سامنے آئی ہے کہ اویناش شکلا اور انوکلپ مشرا ہر بار ایک دوسرے کی مدد کرتے تھے۔ دونوں کے کردار اور باقی ملزمان کے ساتھ ان کے تال میل کی جانچ اب بھی جاری ہے۔
اب تک کی تفتیش میں یہ بھی سامنے آیا ہے کہ چوری کے یہ تمام مبینہ واقعات اس وقت ہوئے، جب چڑھاوے کی گنتی دوپہر 2 بجے سے رات 9 بجے تک چلنے والی دوسری شفٹ میں ہوتی تھی۔ اسی کے بعد مندر انتظامیہ نے احتیاط کے طور پر چڑھاوے کی گنتی کے نظام میں بڑی تبدیلی کی ہے۔ اب چڑھاوے کی گنتی صبح 9 بجے سے شام 6 بجے تک صرف ایک ہی شفٹ میں کی جا رہی ہے۔ فی الحال پولیس پورے معاملے کی تفتیش کر رہی ہے اور پوچھ گچھ میں سامنے آنے والے حقائق کا دیگر شواہد سے موازنہ کیا جا رہا ہے۔
