مدراس ہائی کورٹ سے کامیڈین کنال کامرا کو آج راحت مل گئی۔ ہائی کورٹ نے 28 مارچ کو کامیڈین کنال کامرا کی پیشگی ضمانت عرضی پر اپنا فیصلہ سناتے ہوئے انھیں عبوری پیشگی ضمانت دینے کا فیصلہ سنایا۔ کنال کامرا مہاراشٹر کے نائب وزیر اعلیٰ ایکناتھ شندے پر اپنے طنز کے لیے تنازعہ کا سامنا کر رہے ہیں۔عدالت نے کنال کامرا کو اس شرط پر راحت دی ہے کہ انھیں تمل ناڈو کے ولوپورم واقع ونور میں جیوڈیشیل مجسٹریٹ کے اطمینان کے لیے ایک بانڈ بھرنا ہوگا۔ جسٹس سندر موہن نے دوسرے مدعا علیہ (کھار پولیس) کو بھی نوٹس جاری کیا اور معاملے کی آئندہ سماعت 7 اپریل کو طے کی۔
کامرا نے آج عدالت کو بتایا کہ وہ تمل ناڈو کے ولوپورم ضلع کے رہنے والے ہیں اور انھیں ممبئی پولیس کے ذریعہ گرفتار کیے جانے کا اندیشہ ہے۔ یہ تنازعہ کھار کے ہیبی ٹیٹ کلب میں کامرا کے حالیہ شو سے پیدا ہوا ہے، جہاں انھوں نے ایکناتھ شندے کو نشانہ بناتے ہوئے ایک پیروڈی گانا پیش کیا تھا۔ کامرا کے شو کے بعد شندے گروپ کے شیوسینا حامیوں میں اشتعال پھیل گیا اور انھوں نے گزشتہ اتوار کی شب کلب و ہوٹل میں زبردست توڑ پھوڑ کی تھی۔ شیوسینا رکن اسمبلی مرجی پٹیل کی شکایت پر کھار پولیس نے کامرا کے خلاف معاملہ درج کیا ہے۔ ممبئی پولیس 36 سالہ کامرا کو 2 بار اس معاملے میں طلب بھی کر چکی ہے۔
