ڈابر چیون پراش کے خلاف اشتہار چلانے پر روک

ڈابر انڈیا نے ہائی کورٹ میں عرضی داخل کرکے پتنجلی کے ان ٹی وی اشتہاروں پر اعتراض ظاہر کیا تھا جو مبینہ طور پر ڈابر کے چیون پراش پروڈکٹ کو نشانہ بنا رہے تھے۔ ڈابر کا الزام ہے کہ پتنجلی نے ڈابر پروڈکٹ کو معمولی بتا کر اس کی شبیہ خراب کرنے کی کوشش کی ہے. پتنجلی کے اشتہار میں دعویٰ کیا گیا کہ اس کا چیون پراش 51 سے زیادہ جڑی بوٹیوں سے بنا ہے، جبکہ حقیقت میں اس میں صرف 47 جڑی بوٹیاں ہیں۔ ڈابر نے یہ بھی الزام لگایا کہ پتنجلی کے پروڈکٹ میں پارہ (Mercury) پایا گیا، جو بچوں کے لیے نقصاندہ ہے۔

ڈابر کی طرف سے سینئر وکیل سندیپ سیٹھی نے دلیل پیش کرتے ہوئے کہا، ’’پتنجلی نے گمراہ کن اور غلط دعویٰ کرکے یہ دکھانے کی کوشش کی کہ وہی واحد اصلی آیورودک چیون پراش بناتا ہے جبکہ ڈابر جیسے پرانے برانڈ کو معمولی بتایا گیا۔‘‘ سیٹھی نے یہ بھی بتایا کہ عدالت کے ذریعہ دسمبر 2024 میں سمن جاری کیے جانے کے باوجود پتنجلی نے ایک ہی ہفتہ میں 6182 گمراہ کن اشتہارات نشر کیے۔