پاکستان کے سابق وزیراعظم عمران خان کے لئے رہائی کا حکم جاری

اسلام آباد: پاکستان کے سابق وزیراعظم اور پاکستان تحریک انصاف پارٹی کے سربراہ عمران خان کوعدالت سے بڑی راحت حاصل ہوئی ہے۔ اسلام آباد ہائی کورٹ نے نچلی عدالت کے فیصلے کو معطل کرتے ہوئے انہیں جیل سے رہا کرنے کا حکم دے دیاہے۔ اسلام آباد ہائی کورٹ نے گزشتہ روز عمران خان کی سزا معطلی کی درخواست پر فریقین کے دلائل سننے کے بعد فیصلہ محفوظ کر لیا تھا۔خیال رہے کہ توشہ خانہ کیس میں عمران خان کو 3 سال قید کی سزا سنائی ہےجبکہ الیکشن کمیشن نے ان پر پانچ سال کے لیے الیکشن لڑنے پر پابندی عائد کردی۔ توشہ خانہ کیس میں سزا سنائے جانے کے بعد عمران نے ٹرائل کورٹ کے فیصلے کو اسلام آباد ہائی کورٹ میں چیلنج کیا تھا۔عمران خان نے نچلی عدالت کے فیصلے پر کہا تھا کہ کرپشن کیس میں ٹرائل کورٹ کی طرف سے انہیں سنائی گئی سزا جج کا جانبدارانہ فیصلہ ہے۔انہوں نے کہا تھا کہ یہ مکمل طور پر منصفانہ ٹرائل کے منہ پر طمانچہ ہے۔ اس کے ساتھ یہ انصاف اور مناسب عمل کا مذاق اڑانے کے مترادف ہے۔
5 اگست کو اسلام آباد کی ٹرائل کورٹ نے توشہ خانہ کیس میں عمران خان کو تین سال قید اور ایک لاکھ روپے جرمانے کی سزا سنائی تھی جس کے بعد انہیں لاہور سے گرفتار کرکے اٹک جیل میں قید کیا گیاتھا۔ ٹرائل کورٹ سے سزا کے نتیجے میں الیکشن کمیشن نے چیئرمین تحریک انصاف عمران خان کو الیکشن میں حصہ لینے کے لیے پانچ سال کے لیے نااہل قرار دیا تھا۔
عمران خان پر الزام ہے کہ انہوں نے 2018 سے 2022 کے دوران اپنی وزارت عظمیٰ کے دور میں بیرون ممالک سے ملنے والے قیمتی تحائف کم قیمت پر حاصل کیے اور پھر ان تحائف کو 6 لاکھ 35 ہزار ڈالر میں فروخت کیا۔ عمران خان کو ملنے والے تحائف میں سعودی عرب سے ملنے والی قیمتی گھڑی بھی شامل ہے جس پر خانہ کعبہ کا ماڈل بنا ہوا ہے اور اس کی عالمی مارکیٹ میں قیمت اندازے کے مطابق 60 سے 65 کروڑ روپے ہے۔