مرکزی حکومت نے ہفتہ کے روز مختلف ہائی کورٹ میں 14 ججوں کی تقرری کو منظوری دی ہے۔ مرکزی وزیر قانون و انصاف (آزادانہ چارج) ارجن رام میگھوال نے اس کی اطلاع دی۔ ارجن رام میگھوال نے سوشل میڈیا پلیٹ فارم ’ایکس‘ پر ججوں کی فہرست جاری کرتے ہوئے لکھا کہ ہندوستانی آئین کے ذریعہ عطا کردہ اختیارات کا استعمال کرتے ہوئے اور ہندوستان کے چیف جسٹس سے مشورہ کے بعد صدر جمہوریہ عدالتی افسران کو ہائی کورٹس میں جج/ایڈیشنل جج کے طور پر مقرر کرتی ہیں۔
دہلی ہائی کورٹ میں کل 7 ججوں کی تقرری کی گئی ہے۔ نودیتا انل شرما اور نشا سہائے سکسینہ کو مستقل جج مقرر کیا گیا ہے۔ وہیں سنجے شرما، بھرت پراشر، ادیتی چودھری، دنیش بھٹ اور ارون بھاردواج کو ایڈیشنل جج مقرر کیا گیا ہے۔ ارون بھاردواج فی الحال دہلی ہائی کورٹ کے رجسٹرار جنرل ہیں۔ اس سے قبل 10 ستمبر کو سپریم کورٹ کالجیم نے دہلی ہائی کورٹ کے ججوں کے لیے 8 عدالتی افسران کے ناموں کی سفارش بھیجی تھی۔ حالانکہ مرکزی حکومت نے ان میں سے صرف 7 ناموں کو منظوری دی ہے۔ دہلی ہائی کورٹ میں ججوں کی کل منظور شدہ تعداد 60 ہے۔ فی الحال وہاں 44 جج کام کر رہے ہیں، یعنی 16 عہدے خالی ہیں۔
جھارکھنڈ ہائی کورٹ میں 3 نئے جج مقرر کیے گئے ہیں، جن میں منوج پرساد، اکھل کمار اور رام شرما شامل ہیں۔ جھارکھنڈ ہائی کورٹ میں ججوں کی منظور شدہ تعداد 25 ہے۔ اب تک یہاں 13 جج کام کر رہے تھے اور 12 عہدے خالی تھے۔ نئی تقرریوں کے بعد ہائی کورٹ میں کام کرنے والے ججوں کی تعداد بڑھ کر 16 ہو جائے گی۔ حکومت نے ہفتے کے روز یش پال بورنی کی جموں و کشمیر اینڈ لداخ ہائی کورٹ کے جج کے طور پر تقرری کا اعلان کیا۔ سپریم کورٹ کالجیم نے 10 ستمبر کو ہونے والے اجلاس میں ہائی کورٹ کے جج کے طور پر ان کی تقرری کے لیے ان کے نام کی سفارش کی تھی۔
اس کے علاوہ مرکزی حکومت نے کرناٹک ہائی کورٹ میں 3 عدالتی افسران کو ایڈیشنل جج کے طور پر مقرر کرنے کی منظوری دی۔ جن 3 عدالتی افسران کو ترقی دی گئی ہے، ان میں اوشا رانی، کے ایس بھرت کمار اور نیرالے ویربھدریا بھوانی شامل ہیں۔ کرناٹک ہائی کورٹ میں فی الحال 62 ججوں کی منظور شدہ تعداد کے مقابلے میں 54 جج ہیں۔ ان 3 نئے ججوں کے عہدہ سنبھالنے کے بعد ججوں کی تعداد بڑھ کر 57 ہو جائے گی۔
